Oʻzbekiston U-20 terma jamoamiz yurtimizda oʻtgan Osiyo chempionatida gʻoliblikni qoʻlga kiritib, xalqimizni nihoyatda quvontirdi.
Vakillarimiz haqli ravishda chempion nomiga sazovor boʻldi. Bunda albatta, jamoamizning har bir futbolchisi munosib hissa qoʻshdi. Ularning orasida iqtidorli yarim himoyachi Sherzod Esonov ham bor. Ushbu oʻyinchiga hamma vaqt murabbiylar shtabining ishonchi katta boʻlgan. Osiyo chempionligi qoʻlga kiritilgach, futbolchiga savollar bilan murojaat qildik.
- Avvalo, final haqida soʻramoqchi edim. Oʻyindan oldin hayajon kuchlimidi?
- Finaldagi gʻalabamizni Oʻzbekiston xalqiga, Yurtboshimizga bagʻishlaymiz. Oʻyinda bizga bosim boʻlgani yoʻq. Chunki bunaqa tepmda, 35 ming muxlis qarshisida toʻp surishga oʻrganib boʻldik. Bizga aslo bosim boʻlgani yoʻq. Qaytanga, ishqibozlarimiz jamoamizga katta motivatsiya bagʻishlab turdilar. Oʻyindan olgan hissiyotlarimni oddiy soʻz bilan tushuntirib bera olmayman. Xudoga shukr, xalqimiz oldida yuzimiz yorugʻ boʻldi.
- Yarim finalda terma jamoamiz penaltilar seriyasida gʻalaba qozonib jahon chempionati yoʻllanmasini qoʻlga kiritgandi. Bu esa terma jamoamizga yanada kuch bagʻishladi-a? Har holda boʻshashishlik kuzatilmadimi?
- Shundan keyin jahon chempionati yoʻllanmasi qoʻlga kiritilganidan soʻng elkamizdan qandaydir togʻ agʻdarildi. Asosiy maqsadimiz jahon chempionatiga chiqish edi. Vazifani bajarganimizdan keyin oʻzimizni juda ham engil his qildik.
- Finalda uchrashuv oʻzgacha ruhda oʻtdi. Shaxsan Yurtboshimiz ham bevosita stadionda terma jamoamizni qoʻllab-quvvatlab turdi. Mazkur bahsga tayyorgarlik qanday boʻlgandi? Ya'ni, finalgacha va finaldan keyingi taassurotlaringiz bilan oʻrtoqlashsangiz
- Hammasini oddiy soʻz bilan ta'riflab bera olmayman. Yurtboshimiz shaxsan oʻzlari stadionda bizni kuzatib, jamoamizga muxlislik qildi. Kattakon rahmat. Oʻyinga keladigan boʻlsak, Iroq terma jamoasi bilan guruhda ham oʻynagandik. Raqibning bizga qarshi anchagina tayyorgarlik koʻrgani koʻrinib turgandi. Ular oʻyindan-oʻyinga kuchayib borishdi va finalgacha bejiz etib kelmagandilar. Oʻyin tomonlama kuchaydi. Iroqqa qarshi guruh bosqichidagi uchrashuvga qaraganda finalda qiynaldik.
- Taqdirlash marosimida Muhtaram Yurtboshimiz tomonidan taqdirlanayotgan chogʻingizda nimalarni his qildingiz?
- Bu hayotimdagi eng yorqin lahzalar edi. Buni ta'riflab bera olmayman. Mening eng baxtli onlarim boʻldi. Qolaversa, ota-onam ham stadionda edi. Hammasiga guvoh boʻldilar. Yurtboshimiz, ota-onam va minglab muxlislarimiz qarshisida chempionlikni qoʻlga kiritish oʻzgacha hissiyotlarni berdi.
- Chempionlikdan keyingi kecha qanday oʻtdi?
- Xursandchilik hukm surdi. Butun xalqimizni xursand qila olganimizdan baxtli edik. Osiyo chempioni boʻlishning gashti boshqacha. Yurtboshimizning oʻzi stadionda kuzatib turgani baribir boshqacha, juda va juda yoqimli edi. Haligacha yutganimizga ishonmayapman. Bu xuddi tushga oʻxshaydi. Xudoga shukr, yuzimiz yorugʻ boʻldi.
- Terma jamoamiz endi Indoneziyadagi jahon chempionatida qatnashadi. Futbolchi sifatidagi orzularingiz ham ushalib boryapti. Tabiiyki, mundialga yanada jiddiy tayyorgarlik koʻriladi. Imkoniyatimizni qanday baholayapsiz?
- Albatta, tayyorgarlik juda zoʻr boʻladi, deb oʻylayman. Chunki jahon chempionati katta musobaqa. Mundialda Oʻzbekiston bayrogʻini baland koʻtarmoqchimiz. Hozircha oʻquv-mashgʻulot yigʻinlari haqida aniq ma'lumotga ega emasman. Ammo Evropa jamoalariga qarshi oʻyinlar boʻladi.
Shuhratbek Joʻraev.
“Zamin” yangiliklarini “Telegram”da kuzatib boring
