2024-2025 yilgi mavsumdan OFK Osiyo chempionlar ligasi va OFK kubogi o‘rniga yangi 3 ta musobaqa tashkil etadi. Biz sizga bu musobaqalarda yurtimiz uchun nechta kvota ajratilgani haqida ma’lumot berib o‘tamiz.
Demak, asosiy musobaqa "Osiyo chempionlari ligasi elita" deb nomlanadi. Unda 24 jamoa g‘oliblik uchun kurash olib boradi. 20 ta klub to‘g‘ridan-to‘g‘ri guruh bosqichiga yo‘l olsa, yana 4 ta jamoa saralash bosqichidan guruh o‘yinlarida ishtirok etish huquqini qo‘lga kiritadi.
O‘zbekiston uchun bu turnirda bitta kvota (pley-offga kvota berilmagan) ajratilgan bo‘lib, Superliga g‘olibi Osiyo elita chempionlari ligasi guruh bosqichida qatnashishi mumkin bo‘ladi. Eng ko‘p o‘rin Saudiya Arabistoni va Yaponiya mamlakatlariga ajratilgan - 3 tadan.
Ikkinchi nufuzli musobaqa "Osiyo chempionlar ligasi-2" deb ataladi. Unda 32 jamoa ishtirok etadi. O‘zbekiston uchun mazkur turnirda ham bitta kvota ajratilgan. O‘zbekiston kubogi g‘olibi to‘g‘ridan-to‘g‘ri guruh bosqichiga yo‘l oladi. Agar Superliga va kubok g‘olibi bitta klub bo‘lsa, Superliga vitse-chempioni pley-offda ishtirok etadi.
Uchinchi musobaqa "OFK chaqiruv ligasi" deya atalgan bo‘lib, unda O‘zbekiston uchun kvota mavjud emas.
