Italiya chempionatining to‘qqizinchi turida “Kalyari” o‘zi kabi autsayderlar biri “Salernitana” mehmoni bo‘ldi.
Yuqori divizionda qolish uchun kurashayotgan har ikki jamoaning o‘zaro to‘qnashuvi qizg‘in va murosasiz kurashlar ostida o‘tdi. Gollar o‘yin oxirlarida kiritildi. “Kalyari” 79-daqiqada Zito Luvumboning golidan so‘ng, hisobni ochdi. 86-daqiqada Bulaye Dia vaziyatni tenglashtirli.
84-daqiqada zaxiradan o‘yinga qo‘shilgan Eldor Shomurodov maydonga tushganidan to‘rt daqiqa o‘tib jamoasining ikkinchi goliga assistentlik qildi. O‘zbek legionerining super zarbasini Nikolas Viola darvoza to‘riga joyladi.
Eldor Shomurodovning A Seriyadagi so‘nggi goli o‘tgan mavsumda aynan “Salernitana”ga qarshi o‘tkazilgan uchrashuvda kiritilgan. O‘shanda “Spetsiya” safida o‘ynagan Shomurodov raqib darvozasini ishg‘ol qilib, jamoasiga bir ochko olib bergandi.
Biroq sardiniyaliklarga mavsumdagi ilk g‘alabasini nishonlash nasib qilmadi. Uchrashuv qahramoni bo‘lib turgan Nikolas Viola o‘z jarima maydonchasi ichida qo‘li bilan o‘ynadi. Penaltini Dia bexato bajarib, mezbonlarni mag‘lubiyatdan qutqarib qoldi.
Italiya futbolini yoritib kelayotgan www.tuttocagliari.net sayti ekspertlari “Kalyari” jamoasi o‘yinchilari harakatini quyidagicha baholadi.
Skaffet 6 – O‘yinning birinchi qismida “Kalyari” darvozaboniga ish topilmadi. Biroq bellashuvning oxirida ikkita to‘p o‘tkazib yubordi.
Nandez 6 – O‘ng qanot himoyachisi sifatida juda yaxshi o‘ynadi. U raqibdan to‘pni olib qo‘yish va sheriklariga to‘p uzatishda yaxshi harakat qildi.
Dzappa 6 – Nandesni o‘rniga maydonga tushgan Dzappa ko‘p vaziyatlarda aniq o‘ynay olmagan bo‘lsa-da, ko‘pincha jamoaga foyda keltirdi.
Goldaniga 6 – Maʼlum muddatdan keyin asosiy tarkibga qaytgan futbolchi o‘zini ko‘rsatishga va bexato o‘ynashga eʼtibor qaratdi.
Dossena 6,5 – Himoyani mustahkam ushlab turdi. Raqibning gollari Dossena o‘rnini Obertga bo‘shatib berganidan so‘ng yuzaga keldi.
Obert 4,5 – “Salernitana” birinchi marta hisobni tenglashtirganida raqibga hech qanday qarshilik ko‘rsata olmadi.
Aujello 6 – Himoyaga qaraganda hujumda erkinroq to‘p tepdi. Raqib hujumchilari uni ancha qiynab qo‘ydi.
Deyola 6,5 – Jamoa uchun ko‘p ter to‘kdi. Birinchi bo‘limda xavfli hujum tashkil qildi.
Prati 6,5 — Bu o‘yinchi maydon markazidagi ustunlikni taʼminlab berishga harakat qildi. Uzoq masofadan zarba berishga eʼtibor qaratdi.
Makumbu 6 – Bo‘sh hududlarni ochish va jamoadoshlariga aniq paslar uzatish borasida o‘zini ko‘rsatdi. O‘yin oxiridagi xato jamoaga qimmatga tushishi mumkin edi.
Mankosu 6,5 – Oldingi chiziqda ancha faol o‘ynadi. Uning ishtirokidagi gol o‘yindan tashqari holat tufayli inobatga olinmadi.
Viola 7 – Ikkinchi bo‘limning ilk daqiqasida maydonga tushirilgan futbolchi hujumni kuchaytirdi va gol urdi. O‘yin qahramoni so‘nggi daqiqalarda penaltiga sababchi bo‘lib qoldi.
Oristanio 6 – Har galgidek juda faol o‘ynadi. Hujum tashkil qilishda jonbozlik ko‘rsatdi.
Yankto 6,5 – 63-daqiqadan o‘yinga yaxshi qo‘shildi. Birinchi golda Luvumboga aniq pas uzatdi.
Luvumbo 7 — Raqiblar bu hujumchini to‘xtatishga qiynalyapti. Bu gal ham aynan Zito gollar hisobini ochib berdi. 84-daqiqada o‘rnini Eldor Shomurodovga bo‘shatdi.
Shomurodov 6,5 – O‘yinga juda faol kirishdi. Jamoasining ikkinchi golida Violaga juda qulay pas uzatdi. Uning assisti jamoani hisobda oldinga olib chiqdi.
Ranyeri 6,5 – “Salernitana”ga qarshi o‘yinda Ranyeri shogirdlari butun uchrashuv davomida ustunlik qildi. Biroq bu ilk g‘alabani nishonlashga kamlik qildi.
“Zamin” yangiliklarini “Vkontakti”da kuzatib boring
