Joriy yilning avgust oyida “Paxtakor”dan SSKAga ko‘chib o‘tgan Abbosbek Fayzullayev legioner maqomidagi faoliyatini muvaffaqiyatli boshladi.
Aslida futbolchimiz SSKAni tanlaganida muxlisu mutaxassislar orasida uning Rossiya Premer-ligasidagi imkoniyatlariga shubha bilan qaraganlar ham bo‘ldi.
Ayniqsa, SSKAni boshqarayotgan bosh murabbiy Vladimir Fedotovning ish uslubi va talabchiligi yosh o‘yinchimizga og‘irlik qilishi, Rossiya futboli yakkakurashlarga boyligi tufayli Abbosning gavdasi to‘qnashuvlarga to‘g‘ri kelmasligi kabi bir necha omillar tilga olindi.
Fedotov ham SSKAning yozdagi birinchi transferi bo‘lgan Fayzullayevni ma’lum muddat maydonga tushirmadi va qarorini Abbos mashg‘ulotlar orqali jismoniy holatini talab darajasiga olib kelish bilan mashg‘ul ekanini ta’kidlash orqali izohladi.
Keyin ikkita uchrashuvda zaxiradan maydonga tushgan hamyurtimizga “Krilya Sovetov” bilan bo‘lgan o‘yinda to‘lik ikkinchi taymda o‘ynash imkoni berildi. Abbos bu uchrashuvda jamoasi o‘yinini o‘zgartirib yuborgani va SSKAni o‘z uyidagi mag‘lubiyatdan qutqarib qolganidan keyin asosiy tarkibdan muqim joy oldi.
Hozir SSKA hujumida Abbosbek Fayzullayev va Fyodor Chalov tandemi hosil bo‘lgan. “Armiyachilar”ning keyingi paytdagi aksariyat gollari mana shu ikki futbolchi ishtirokidagi hujumlardan kiritilyapti.
Fayzullayevning Rossiya maydonlaridagi muvaffaqiyatlari debyutidan keyin ekspertlar, taniqli futbolchilar, murabbiylar va muxlislar uni chempionat kashfiyoti sifatida e’tirof eta boshladi.
Biroq SSKA bosh murabbiyi Vladimir Fedotov bunga qo‘shilmayapti. Rossiya futbolini yoritib kelayotgan sport24.ru sayti jurnalisti Andrey Babich bilan suhbatda “armiyachilar” ustozi o‘z pozitsiyasini quyidagicha izohladi.
- Fayzullayevni mavsum kashfiyoti deyapsizmi? Chempionat endi boshlandi. Bir necha o‘yinga qarab, o‘yinchiga baho berish yaramaydi.
Mana, Lionel Messiga baho berish mumkin, U sakkizinchi “Oltin to‘pi”ni qo‘lga kiritgan. Abbosni chalg‘itmagan ma’qul, - dedi Vladimir Fedotov.
Darhaqiqat, Fayzullayevning jismoniy ko‘rsatkichlari Messiniga o‘xshab ketadi. Argentinalik yulduz ham jismonan baquvvatligi bilan maqtana olmaydi. Bo‘y-basti bilan ajralib turmasa ham,kerativ o‘yini, aqlli qarorlari, chaqqon va tezkorligi evaziga jahon futbolida misli ko‘rilmagan natijalarni qayd etgan.
“Zamin” yangiliklarini “Telegram”da kuzatib boring
