"Al-Hilol" ustozi Jorje Jezush va darvozabon Yassin Bunu "Navbahor" haqida nimalar dedi?

Osiyo Chempionlar ligasi (OCHL) guruh bosqichi, 5-turidan o‘rin olgan “Navbahor” – “Al-Hilol” uchrashuvidan oldingi matbuot anjumanida mehmonlar bosh murabbiyi Jorje Jezush va tajribali darvozabon Yassin Bunu qatnashib, OAV xodimlarining savollariga javob berishdi.

– Jamoaning bo‘lajak o‘yinga tayyorgarligi qanday bo‘ldi?

– Har bir uchrashuvga bo‘lganidek, ushbu bahsga ham jiddiy tayyorgarlik ko‘rdik. Boisi, bu o‘yin odatiy jiddiy bellashuvlar kabi yuqori ahamiyatga ega bo‘lgani uchun tayyorgarlik jiddiy bo‘ldi.

– Saudiyadagi bahsda “Navbahor” jamoangizga jiddiy qarshilik ko‘rsatgan edi. Bo‘lajak o‘yindan nimalar kutyapsiz hamda “Navbahor”ni qanchalik o‘rgandingiz?

– Xabaringiz bor, ertangi uchrashuvda guruhimizning ikkita eng kuchli jamoalari to‘qnash keladi va bu o‘yin muxlislarga ham qiziq bo‘ladi. Shuning uchun ertaga bizga oson bo‘lmaydi, deb o‘ylayman.

­– Neymarning jarohat olgani jamoaning ichki chempionat hamda OCHL o‘yinlaridagi natijalariga qanchalik ta’sir o‘tkazmoqda?

– Neymar bizning muhim futbolchimiz. Afsuski, hozir u safimizda yo‘q. Neymar nafaqat ertangi, balki, keyingi ko‘plab bahslarda bizga yordam bera olmaydi va ko‘proq muddatga safdan chiqqan. Lekin shunday bo‘lsada, jamoa Neymarsiz ham o‘ynay oladi, deb o‘ylayman.

– Ertangi o‘yinda “Al-Hilol” legionerlar limitidan to‘liq foydalanadimi yoki mahalliy futbolchilarga ko‘proq  urg‘u beriladimi?

– Jamoamizning taqvimi juda ham tig‘iz. Shu bois, bizda shunday holatlar bo‘lyaptiki, ba’zida rotatsiyalarni amalga oshirishga  majbur bo‘lyapmiz. Ertangi uchrashuvda qanday tarkibda o‘ynashimizni o‘yin vaqtida bilib olasiz.

– “Navbahor”ning ayni paytdagi imkoniyatlarini qanday baholaysiz hamda hamkasbingiz O‘tkir Yusupov haqida qanday fikrdasiz?

Yassin Bunu: – Avvalo darvozabon haqida gapiradigan bo‘lsam, Saudiyadagi o‘yinda O‘tkir Yusupov menda juda yaxshi taassurot qoldirgan edi. Bilishimcha, u yaxshi darvozabon. “Navbahor”ga kelsak, ertangi raqibimiz ham yaxshi shakllangan jamoa.

Menimcha, ertaga jiddiy qarshilikka uchraymiz. Namanganga kelganimdan va ertangi o‘yinda ishtirok etishimdan juda xursandman.