Italiya A Seriyasi debyutanti “Kalyari” rahbariyati chempionatning birinchi yarmi bo‘yicha dastlabki xulosalarni chiqara boshladi.
Klaudio Raneri shogirdlari uchun chempionat juda og‘ir boshladi. Vaziyat endi o‘nglanmoqda. Lekin har bir ochko juda katta qiyinchiliklar evaziga qo‘lga kiritilyapti. Tajribali murabbiy hali ham o‘zi istagan jangovar tarkibni shakllantira olgani yo‘q. O‘zgarishlar juda ko‘p bo‘lyapti.
Italiya futbolini yoritib borayotgan manbalardan biri L'Unione Sarda nashrining yozishicha, sardiniyaliklar qishki transferlar davrida yana faol ishlashni rejalashtirmoqda.
“Kalyari” singari klublar katta xarajat qila olmaydi. Shu bois, yangi o‘yinchi olishi uchun tarkibdagi futbolchilarning ayrimlaridan voz kechishga to‘g‘ri keladi.
Nashr eksperti Alberto Masaning ta’kidlashicha, Klaudio Raneri boshchiligidagi murabbiylar shtabi dekabr oyi davomida bir necha futbolchilarning harakati va ko‘rsatkichlarini tahlil qilib boradi. Shundan so‘ng hal qiluvchi qaror chiqariladi.
Manbaning ta’kidlashicha, chiqishga birinch nomzod Gaston Pereyro. 28 yoshli urugvaylik hujumkor futbolchi Sardiniyaga 2020 yili Niderlandiyaning PSV klubidan transfer qilingan. Bir necha pozitsiyada o‘ynay oladigan Gaston o‘tgan mavsumni ijara asosida “Nasonal”da o‘tkazdi. Yurtidan qaytib kelganidan keyin “Kalyari”da asosiy tarkibga kira olmay qoldi va hali ham A Seriyada debyutini nishonlagani yo‘q.
Kludio Raneri va sport direktori Bonato diqqat bilan kuzatayotgan yana bir o‘yinchi Eldor Shomurodov hisoblanadi.
Nufuzli manba tuttomercatoweb.com sayti eksperti Filippo D'Anjeloning ta’kidlashicha, klub rahbariyati va murabbiylar shtabi o‘zbek futbolchisi ko‘rsatayotgan natijalardan qoniqmayapti. Qolaversa, jamoada eng katta maosh olayotganlardan biri hisoblangan Shomurodovning zaxira o‘rindig‘ida qolib ketayotgani ham mutasaddilarni o‘ylantirib qo‘ygan.
Yuzaga kelgan vaziyat Shomurodov oldiga jiddiy talablar qo‘ymoqda. Eldor bir oy davomida o‘z mahoratini ko‘rsatishi va maydonda o‘ziga beriladigan vaqt ichida foydali harakatlarni amalga oshirishi lozim.
Berilgan muddatda o‘zbek legioneri faoliyatida ijobiy o‘zgarishlar bo‘lmasa, “Kalyari” rahbariyati yanvarda uni “Roma”ga qaytarib yuborib, o‘rniga boshqa hujumchini transfer qilishi rejalashtirilayotgani aytilmoqda.
“Kalyari” yozda Shomurodovni bir mavsum ijaraga olish uchun rimliklarga bir million yevro to‘lagan edi. Shuningdek, sardiniyaliklarda hujumchini kelasi yozda 9 million yevro to‘lab, to‘liq transfer qilish huquqi ham bor.
Shomurodov joriy mavsumda A Seriya va Italiya kubogida jami 12 ta uchrashuvda maydonga tushib, atigi bitta assist qayd etdi xolos.
“Kalyari” navbatdagi uchrashuvni 2 dekabr kuni poytaxtda “Latsio” jamoasiga qarshi o‘tkazadi.
“Zamin” yangiliklarini “Telegram”da kuzatib boring
