Ayub Odisho: "Musobaqa bilan erta xayrlashdik, biroq ushbu turnirdagi g‘alabalarimiz sonini oshirib qo‘ymoqchimiz"
Bugun Osiyo chempionlar ligasi guruh bosqich 6-turi doirasida OKMK safarda "Eyr Fors" bilan kuch sinashadi.
Ushbu bahs natijasi qanday bo‘lishiga qaramay, har ikki klub keyingi bosqichga chiqish imkoniyatini qo‘ldan chiqarib bo‘lgan.
"Bo‘lajak uchrashuvdagi g‘alaba qog‘ozda qolib ketadi, biz musobaqa bilan erta xayrlashdik, biroq ushbu turnirdagi g‘alabalarimiz sonini oshirish uchun mazkur bahs muhim ahamiyatga ega. Qisqa tayyorgarlik davri va Iroq chempionatining kechikib boshlanishiga qaramay, Osiyo Chempionlar ligasining guruh bosqichida yaxshi o‘yin namoyish etdik. Umid qilamanki, OKMKga qarshi yaxshi o‘yin o‘tkazib, ijobiy natijaga erishamiz", - dedi Ayub Odisho.
"Lochinlar"ni qo‘llab-quvvatlayotgan muxlislardan uzr so‘raymiz, chunki pley-off yo‘llanmasini qo‘lga kiritish baxti bizga nasib etmadi. Umid qilamanki, bo‘lajak o‘yinda ijobiy natijaga erishamiz va klubning sodiq muxlislarini mamnun etamiz. Uchrashuvga tayyormiz, - dedi Saad Abdul Amir.
Eslatib o‘tamiz, "Eyr Fors" - OKMK uchrashuvi O‘zbekiston vaqti bilan 17:00da start oladi.
“Zamin” yangiliklarini “Youtube”da kuzatib boring
