Abbosbek Fayzullayev o‘zbek futbolining eng yorqin tarbiyalanuvchilaridan hisoblanardi. Bir yil muqaddam uni yurtimizda ham ko‘pchilik yaxshi tanimas edi. Katta futbolga qadam qo‘yishi bilan o‘z salohiyatini namoyish eta olgan Fayzullayev o‘zbek futbolida o‘z o‘rnini topib bormoqda.
Fayzullayev avgust oyida “Paxtakor”dan Moskvaning SSKA klubiga ko‘chib o‘tganidan keyin Rossiyadagi futbol jamoatchiligi e’tiborini o‘ziga qarata oldi. 20 yoshli legionerimiz juda qisqa fursat – ikki-uch oyda murakkab liganing eng zo‘r o‘yinchilari qatoriga qo‘shildi.
Ayni paytda Abbosbek Fayzullayev Rossiya futbolida eng ko‘p muhokama qilinayotgan o‘yinchilardan biri hisoblanadi.
Sports.uz portali o‘zbekistonlik muxlislar e’tiboriga rossiyalik futbol ekspertlarining Abbosbek Fayzullayev haqidagi fikr-mulohazalarini havola qilishda davom etadi.
Dmitriy Alenichev, “Lokomotiv”, “Spartak”, “Portu” sobiq futbolchisi, Yevropa Ligasi va Chempionlar ligasi g‘olibi:
Chempionatdagi plyuslar haqida gapirsam, menga Fayzullayev juda yoqdi. Bu SSKA uchun juda zo‘r transfer. Pinyayev barqaror bo‘lmasa ham iqtidorli o‘yinchi. Tyukavin va Spersyanni ham mavsum kashfiyotlari deyish mumkin. Bu o‘yinchilar o‘z iqtidorini namoyish qilishda davom etsa, Yevopaning kuchli ligalariga o‘tish imkoniyati bor.
Konstantin Alekseyev, jurnalist:
Abbos Fayzullayev – tezkor oyoq harakatlari va muntazam o‘tkir hujumlar, degani. Boshida moslashish uchun juda kam vaqt sarfladi va yil oxiriga borib, 20 yoshli o‘zbek hammasini joyiga soldi. Oxirgi sakkizta uchrashuvda 1+8 ball. Abbos kutilmaganda SSKAning haqiqiy yetakchisiga aylandi.
Denis Popov, SSKAning sobiq futbolchisi:
Abbosbek Fayzullayev – yosh va istiqboli porloq yigit. Hech kim uni tanimas edi, lekin Premer-ligaga kelib, zo‘r futbolchi ekanini ko‘rsata oldi.
Saviyasi yuqori jamoalar va futbolchilarni o‘rtamiyonalardan qaysi jihatlar ajratib turishini bilasizmi? Ularning qay darajada uzoq muddat yuqori saviyada o‘ynay olish qobiliyati ajratib turadi.
Boshida raqiblar ularga jiddiy e’tibor qaratmasligi mumkin, lekin keyinchalik vaziyat tubdan o‘zgaradi.
Kelasi yildan maydonda Fayzullayevga umuman boshqacha munosabat bo‘ladi. Uning o‘yiniga raqib tomondan individual yondashuv bo‘ladi. Bundan buyog‘iga Abbos faoliyatida tubdan burilish yasaydigan va ko‘p narsaga oydinlik kiritiladigan davr boshlanadi.
Agar Fayzullayev ana shu sinovlarda matonat bilan yengib o‘tsa, unda buyuk futbolchi bo‘lish imkoniyati yuzaga keladi.
Valeriy Masalitin, SSKA sobiq futbolchisi:
Bugungi kunda Fayzullayev SSKAning eng zo‘r o‘yinchisi. U “armiyachilar” hujum chizig‘ida eng foydali futbolchi. Abbosbekning kelajagi qanday bo‘lishi noma’lum. Agar u haqiqatan aqlli futbolchi bo‘lsa, rivojlanishda, o‘sishda davom etadi.
Abbosbek Fayzullayev SSKA safida barcha turnirlarda 18 ta uchrashuv o‘tkazib, ikkita gol va to‘qqizta assist muallifi bo‘ldi. Bugungi kunda iste’dodli futbolchimizning transfer summasi 4 million yevroni tashkil qilyapti.
“Zamin” yangiliklarini “Instagram”da kuzatib boring
