Qatar yashil maydonlarida o‘tkazilayotgan Osiyo kubogining so‘nggi tur o‘yinlariga start berildi.
Bugun "B" guruhida 3-tur uchrashuvlari o‘tkaziladi va pley-off ishtirokchilari aniqlanadi. Srechko Katanes qo‘l ostidagi O‘zbekiston terma jamoasi Avstraliyaga qarshi maydonga tushadi. Ayni damda ikki jamoa guruhda yonma-yon joylashgan. Avstraliyani mag‘lubiyatdan boshqa har qanday natija peshqadamlikni ta’minlasa, O‘zbekiston terma jamoasidan guruh g‘olibiga aylanishi uchun g‘alaba talab etiladi, biroq durang ham 2-o‘rinni kafolatlaydi. Mazkur to‘qnashuv oldidan hamyurtlarimizga pley-off bosqichida ro‘baro‘ kelishi mumkin bo‘lgan raqiblar to‘g‘risida mulohaza yuritamiz.
Guruhda 1-o‘rin
Ehtimoliy raqiblar: Xitoy (25%), Falastin (35%), Indoneziya (40%).
O‘zbekiston terma jamoasi guruh g‘olibi sifatida nimchorak finalda A/C/D guruhida 3-o‘rinni egallagan jamoalardan biri bilan to‘qnash keladi. "A" guruhida Xitoy uchta o‘yin o‘tkazib bo‘ldi va 3-o‘rinni tayin qildi. Biroq olti guruhdan to‘rtta uchinchi o‘rin sohibi keyinga bosqichga yo‘l olishini inobatga olsak, 2 ochko jamg‘argan Xitoyning pley-off bosqichida ishtirok etish imkoniyati past.
"C" guruhidagi Falastin so‘nggi turni Gongkongga qarshi o‘tkazadi va jamoada kerakli natija qayd etish uchun imkoniyat yetarlicha. Biroq uchrashuv durang natija bilan yakunlangan taqdirda, arab mamlakatiga ham ochkolar yetmay qolishi mumkin.
"D" guruhidagi Indoneziya esa 3 ochkoni naqd qilib ulgurgan. Garchi jamoa so‘nggi turda Yaponiyaga qarshi bahs olib borsa ham, yutqazgan taqdirda ham quyi pog‘onaga tushib ketmasa kerak.
O‘zbekiston terma jamoasi 1/8 finalda ham zafar quchgan taqdirda "F" guruhi g‘olibi — "E" guruhi 2-o‘rin sohibi qarama-qarshiligi g‘olibi bilan to‘qnash keladi. Ayni damda "F" guruhida Saudiya Arabistoni yetakchilik qilayotgan bo‘lsa, "E" guruhi 2-pog‘onasidan Janubiy Koreya o‘rin egallagan.
Guruhda 2-o‘rin
Ehtimoliy raqiblar: O‘mon (40%), Tailand (35%), Saudiya Arabistoni (25%).
O‘zbekiston terma jamoasi guruhda 2-o‘rinni qo‘lga kiritgan taqdirda "F" guruhida 2-o‘rinni egallagan jamoa bilan yuzma-yuz keladi. Ayni damda ushbu guruhda Saudiya Arabistoni peshqadamlik qilayotgan bo‘lsa, Tailand uni ta’qib qilmoqda. So‘nggi turda mazkur ikki jamoa uchrashadi. Shuningdek, O‘mon ham 2-o‘rin ilinjida yirikroq g‘alabaga erishishga intiladi. Qirg‘iz Respublikasi ham anoyi raqib emas, biroq baribir arablarning imkoniyati yuqoriroq baholanmoqda. Saudiya Arabistoniga durang natija ham peshqadamlikni kafolatlaydi. Tailand ham 1 ochko evaziga 2-o‘rinni naqd qiladi. Biroq Saudiya Arabistoni oxirgi turda maydonga asosiy tarkibni tashlashi yoki guruh g‘olibligini Tailandga "sovg‘a qilib yuborishi" mumkin.
Sababi mazkur guruh g‘olibi yuqorida ta’kidlaganimizdek, "E" guruhida 2-o‘rinni egallagan jamoaga ro‘baro‘ keldi. Ushbu o‘rinda turgan Janubiy Koreya esa so‘nggi turda g‘alaba qozonib ham yetakchiga aylana olmasligi mumkin. Sababi, 1-o‘rindagi Iordaniyada to‘plar nisbati yaxshiroq va ular so‘nggi turda ham ko‘proq gol urishga intilishadi. Agar koreyslar 2-o‘rinda qolib ketgan taqdirda, Saudiya Arabistoni guruh g‘olibligidan voz kechib, kuchli Janubiy Koreya o‘rniga qulayroq raqib hisoblangan O‘zbekiston variantini tanlashi mumkin. Saudiyaliklar koreyaliklardan keyinroq o‘yin o‘tkazishini hisobga olsak, arablar kutish rejimiga amal qiladi.
O‘zbekiston terma jamoasi mazkur kvartet bo‘yicha 1/8 finalda g‘olib chiqqan taqdirda "A" guruhi g‘olibi Qatar hamda C/D/E guruhlaridan birining 3-o‘rin sohibi o‘rtasidagi bellashuv g‘olibiga qarshi maydonga tushadi.
Guruhda 3-o‘rin
Ehtimoliy raqiblar: Iroq yoki Eron (60%), BAA (40%)
O‘zbekiston terma jamoasi guruhda 2-o‘rinni qo‘lga kiritgan taqdirda "C" guruhi g‘olibiga qarshi maydonga tushadi. Mazkur guruhda Eron 6 ochko bilan peshqadamlik qilayotgan bo‘lsa, 4 ochko bilan BAA forslarni ta’qib qilmoqda. Biroq G‘alinoi shogirdlarini 3-turdagi o‘zaro qarama-qarshilikda durang ham qoniqtiradi va jamoaning mag‘lubiyatga uchrash ehtimoli past baholanmoqda.
O‘zbekiston mazkur yo‘nalish bo‘yicha 1/8 finalda Eronni yenggan taqdirda "E" guruhi g‘olibi — "D" guruhi 2-o‘rin sohibi qarama-qarshiligida zafar quchgan jamoa bilan to‘qnash keladi. "E" guruhida Iordaniya peshqadamlik qilayotgan bo‘lsa, "D" guruhida Yaponiya 2-o‘rinni egallab turibdi. Katta ehtimol bilan mazkur juftlik nimchorak finalda uchrashadi.
"D" guruhi g‘olibi Iroq mag‘lub etilganda esa Tojikiston — "C" guruhi 2-o‘rin sohibi (BAA) juftligi g‘olibi chorak finalda bizga raqib bo‘ladi.
Nima bo‘lgan taqdirda ham O‘zbekiston terma jamoasining faqat va faqat g‘alaba uchun maydonga chiqishini istab qolamiz. Zero, chempionlikni maqsad qilgan jamoaning raqib tanlashi ham mantiqan to‘g‘ri kelmaydi. Hamyurtlarim qanday natija qayd etishidan qat’i nazar ularni qo‘llab-quvvatlashda davom etamiz. Ba’zan kutilgan natijaga erishilmagan taqdirda ham mardonavor o‘yin bilan muxlislar mehrini qozonish mumkin.
Muallif: Oqil Abdubarnoyev
“Zamin” yangiliklarini “Facebook”da kuzatib boring
