Server Jeparov golni nishonlamaganiga izoh berdi

Kecha "Ulsan Xyonde" safida ilk o‘yinidayoq o‘z hisobiga gol yozib qo‘ygan hamyurtimiz Server Jeparov doimgi saltolarini ijro etmadi. Server o‘yindan keyin koreys OAVlariga buni quyidagicha izohladi:

"Seul mening Koreyadagi ilk jamoam. U erda ajoyib mavsum o‘tkazganman. Seulliklar muxlislari mening umrbod qalbimda qoladi. Shuning uchun "Seul"ga gol ursam uni nishonlamaslikka ahd qilganman".

O‘tgan ikki mavsumni Server Janubiy Koreyaning boshqa klubi "Seongnam"da o‘tkazdi. Koreys jurnalistining: "Demak, "Seongnam"ga ham gol ursangiz nishonlamaysizmi?", degan savoliga esa hamyurtimiz kulimsirab quyidagicha javob qaytargan: "Avvalo, gol urib olay. Agar gol ursam salto bilan nishonlayman".

Koreys matbuoti Serverning bu javobini o‘tgan mavsumning qoq yarmigacha zaxiraga mixlab qo‘ygani uchun seongnamliklar rahbariyatidan xafa bo‘lganlikka yo‘ydi. Bu xabar koreys OAVlarida e’lon qilingach, "Seongnam" klubining Tvitter ijtimoiy tarmog‘idagi rasmiy sahifasi: "Atigi 1 mavsumgina to‘p tepgan "Seul" klubi muxlislari maqtovga loyig‘u 2 mavsum bizning safimizda bo‘lib, seongnamliklarga hurmat bajo qilish shumi?", deya yozg‘irgan.

"Ulsan" va "Seongnam" jamoalari 16 may kuni Seongnam shahrida to‘qnashishadi.


Manba: www.stadion.uz “Zamin”ni Telegramʻda oʻqing!