Shomurodov gol urmasa boʻlmaydi...

Evropa ligalarida FIFA kunlari munosabati bilan ikki haftalik tanaffus e'lon qilinganidan foydalanib, turli tahlillar natijalari e'lon qilinmoqda.

Ma'lumot oʻrnida ta'kidlash lozimki, A Seriyadan jami 179 nafar futbolchi oʻz mamlakatlari terma jamoalariga qoʻshilgan. Eng koʻp futbolchi joʻnatgan klublar “Roma” va “Milan” boʻlib turibdi. Bu klublardan 15 nafardan oʻyinchi xalqaro uchrashuvlarda ishtirok etish uchun ketgan.

Italiya futbolini tahlil qilayotgan manbalar Evropa Chempionlar ligasi yoʻllanmasi uchun kurashayotgan jamoalar orasida “Roma”ning samaradorligi sezilarli darajada past ekaniga e'tibor qaratdi.

Ana shunday manbalardan calciomercato.com portali eksperti Daniele Aloizi Rim klubi hujum chizigʻidagi vaziyatni oʻrganib chiqib quyidagi tahlillarni mxlislar e'tiboriga havola etdi.

- Mavsum boshi “Roma” uchun barqaror boʻlgani yoʻq. Zoʻr oʻyinlar qatori oʻta zerikarlilarini ham koʻrdik, oʻsish ham, pasayish ham boʻldi. Bosh murabbiy vazifasidan Daniele De Rossining olinib, uning oʻrniga Ivan Yurichning kelgani ham kutilgan samarani bermadi.

“Roma” ochko olish uchun gol urishni oʻrganishi kerak. “Boʻrilar” dastlabki etti turda atigi sakkizta toʻp kiritdi. Koʻrsatkich ijobiy emas. Hujum chizigʻidagilarga e'tiroz koʻp, faqatgina Artyom Dovbik vazifasini uddalayapti.

Ukrainalik futbolchi uchta – jamoasi gollarining deyarli yarmiga mualliflik qildi. Ivan Yurichning oʻzi ham hujumdagi samaradorlikni oshirish kerakligini e'tirof etdi.

Faktlarga e'tibor qaratilsa, “Roma” darvoza tomon yoʻllangan zarbalar soni boʻyicha ligada etakchi. Ular 117 marotaba zarba bergan. Lekin darvozaga toʻgʻri etib borgan zarbalar 37 tani tashkil qiladi.

“Roma” faqatgina Dovbikka suyana olmaydi. Boshqa hujumchilar ham gol urmasa boʻlmaydi. Ikki argentinalik hujumchilar – Paulo Dibala va Matias Sule harakatini kuchaytirishi kerak. Dibala yangi mavsumda penaltidan bitta toʻp kiritdi xolos. Katta umidlar bilan olib kelingan Sule hali Rim klubida birorta samarali harakatni amalga oshirmadi.

Hujum chizigʻi vakillaridan Dovbikdan boshqa Eldor Shomurodov gol urdi xolos. Stefan El-Shaaravi ham hozircha jim.

“Roma”ning qolgan gollari yarim himoya vakillari Tommazo Baldantsi, Brayan Kristante va Nikolo Pizilli hisobga toʻgʻri keladi, - deb yozdi calciomercato.com portali eksperti Daniele Aloizi.

Ta'kidlash joizki, Rim klubi hujumchilari orasida eng kam oʻyin vaqtiga ega boʻlgan oʻyinchi Eldor Shomurodov hisoblanadi. 29 yoshli forvardimiz jami toʻrtta uchrashuvda qatnashib, hammasi boʻlib atigi 34 daqiqa harakat qilgan va “Roma”ning birinchi toʻpini kiritgan.

Aytish mumkinki, yangi bosh murabbiy ham Eldorga tayyorgarligiga yarasha etarli oʻyin amaliyoti bermayapti. Endi legionerimiz bor mahoratini Oʻzbekiston milliy terma jamoasi safida 10 va 15 oktyabr kunlari Eron va Birlashgan Arab Amirliklari bilan boʻladigan oʻta muhim uchrashuvlarda koʻrsatishiga toʻgʻri keladi.

Shunday ekan, Shomurodov Oʻzbekiston milliy terma jamoasida ham, “Roma”da ham gol urmasa boʻlmaydi. “Zamin” yangiliklarini “Telegram”da kuzatib boring