Jahon chempionati: Afruza Hamdamova amaldagi jahon chempionini magʻlub etdi

AQShning Nyu-York shahrida shaxmat boʻyicha rapid va blits yoʻnalishlari boʻyicha jahon chempionati boʻlib oʻtmoqda.

Ayollar oʻrtasidagi dunyo birinchiligida yagona vakilamiz Afruza Hamdamova (2188) yurtimiz sharafini himoya qilmoqda.

Yoshlar oʻrtasida ikki karra jahon chempioni boʻlgan Afruza 8 imkoniyatdan 5,5 ochko jamgʻarib, qoʻshimcha koʻrsatkichlarga koʻra 15-oʻrinni egallab turibdi. Toʻqqizinchi pogʻonadagi xitoylik grossmeyster Tan Jong Yi (2502) hisobida ham 5,5 ochko bor.

Hamdamova kecha tunda oʻtkazilgan 4 ta turda 2 gʻalaba, 1 durang va 1 magʻlubiyat qayd etdi. Afruza 7-turda qora donalarda oʻynaganiga qaramay,ikki karra jahon chempioni, blits yoʻnalishida amaldagi jahon chempioni rossiyalik Valentina Gunina (FIDE, 2388)ni magʻlub etishni uddaladi. U 8-turda qozogʻistonlik grossmeyster, blits yoʻnalishida ikki karra jahon chempioni Bibisara Assaubaeva (2444) bilan durang oʻynadi. Beshinchi turda ruminiyalik Irina Bulmaga (2378)dan ustun keldi.

Turnir jadvalida 8 imkoniyatdan 6,5 ochko jamgʻargan xitoylik Ju Venjun (2536) qoʻshimcha koʻrsatkichlarga koʻra peshqadamlik qilmoqda.
“Zamin” yangiliklarini “Vkontakti”da kuzatib boring