Soʻnggi transfer xabarlari: Husanovga «Siti» qiziqmoqda, Shomurodov «Roma»dan ketishi kutilmoqda

1 yanvar kuni Evropa futbol ligalarida qishki transferlar oynasi ochildi va ilk transferlar rasmiylashtirildi. Eng qiziq transferlar esa hali oldinda. Quyida keyingi bir oy davomida qaysi futbolchi qaysi klubga oʻtishi mumkinligi haqidagi soʻnggi xabarlar keltiriladi.

Abduqodir Husanov yana bir grand klub nigohida

«Manchester Siti» Oʻzbekiston milliy jamoasi vakiliga qiziqmoqda. Jahon futbolidagi nufuzli insayderlardan biri Fabritsio Romano xabar berishicha, «shaharliklar» klubi «Lans» himoyachisi Abduqodir Husanovni qishki transferlar oynasi uchun short-listiga kiritgan.

Husanov ayni vaqtda Evropa ligalarida oʻz pozitsiyasida eng yaxshilaridan biri hisoblanadi. Joriy mavsumni yuqori saviyada oʻtkazayotgan 20 yoshli futbolchiga Evropaning boshqa top-klublaridan ham qiziqishlar mavjud. Dekabr oyida The Telegraph APLning etti klubi unga qiziqish bildirayotgani, bu klublar qatorida «Tottenhem» va «Nyukasl» nomlari borligini xabar qilgandi. Shuningdek, uning nomi «PSJ» va «Real» bilan ham bogʻlangan.

Abduqodir frantsuzlar klubiga 2023 yilda 100 ming evro evaziga Belarusning «Energetik-BGU» klubidan oʻtgandi. U Frantsiya chempionatining joriy mavsumida jamoasining asosiy tarkib futbolchisiga aylandi va qator oʻyinlarda eng yaxshi futbolchi deb topildi. Shuningdek, muxlislar talqiniga koʻra u liganing 1-davra yakunlariga koʻra ramziy jamoasidan joy olgan.

Manchester klublari haqida ishonchli insayder hisoblangan Saymon Baykovskining yozishicha, «Manchester Siti» Husanovni Belarusdagi faoliyatidan boshlab kuzatib keladi.

U Manchester Evening News nashridagi kolonkasida klub unga 2023 yilgi mavsum boshidan buyon qiziqib kelayotgani, faqat oʻsha vaqtda unga asosiy tarkib uchun nomzod sifatida emas, kelajakda tarkibni kuchaytirishi mumkin boʻlgan istiqbolli futbolchilardan biri sifatida qaragani haqida yozgan.

Transfermarkt portalida uning transfer bahosi 12 mln evro qilib koʻrsatilgan. Baykovskining ma'lumotiga koʻra, «Lans» uning transferidan kamida 25 mln evro ishlab olishni koʻzlagan.

Eldor Shomurodov jamoasini oʻzgartirishi mumkin

Italiyaning «Empoli» klubi oʻzbekistonlik boshqa bir futbolchi Eldor Shomurodovga qiziqish bildirmoqda.
Janluka Di Martsioning ma'lumotiga koʻra, italyanlar klubi asosiy hujumchisi Petro Pellegri jarohatlangani tufayli ushbu pozitsiyani mustahkamlash ustida ishlamoqda va «Roma» hujumchisi birinchi variant hisoblanadi.

Oʻz navbatida, 29 yoshli futbolchi ham yozda Rim klubiga Artyom Dobvik kelganidan keyin asosiy tarkibga kirish imkoniyatini yoʻqotdi, qolaversa, klubning natijalari yomonlashgach, unga ishonch bildirilmay qoʻydi. Shomurodov A Seriyaning joriy mavsumida faqat 8 oʻyinda, barchasida zaxiradan tushib ishtirok etgan va koʻrsatkichlari ham shunga yarasha: 1 gol va 1 assist.

«Barselona» Olmoni olib qola oladimi?

«Barselona» rahbariyati yarimhimoyachi Dani Olmo hamda forvard Pau Viktorni mavsumning ikkinchi davrasi uchun roʻyxatdan oʻtkazishiga ishonmoqda, deb xabar qiladi Sport.es.

Nashr ma'lumotiga koʻra, 2 yanvar kuni klub direktorlari kengashi yigʻilishi oʻtkazilgan. Menejerlar uy stadionidagi VIP-joylar sotuvi orqali tushadigan daromadni rasmiylashtirishni soʻramoqda va shu daromad ikki futbolchini roʻyxatdan oʻtkazishga yordam beradi deb hisoblamoqda: aynan qoʻshimcha daromad kataloniyaliklarga la liganing iqtisodiy qoidalariga mos kelishga imkon beradi.

Avvalroq, la liga va Ispaniya qirollik futbol federatsiyasi (RFEF) «Barselona»ga Olmo va Viktorni roʻyxatdan oʻtkazishni rad etgandi.

Olmo «Barselona»ga 2024 yil avgustida «Leyptsig»dan kelgandi. Oʻshanda klub 26 yoshli ispaniyalikni faqat 2024/25 yillar mavsumining birinchi yarmi uchun roʻyxatdan oʻtkazishga erishgandi. Yarimhimoyachining shartnomasida agar yanvarda roʻyxatga olinmasa, klubni erkin agent sifatida tark etishi mumkinligi haqida punkt mavjud.

Mavsumning birinchi davrasida Olmo «Barselona» safida barcha turnirlar doirasida 15 uchrashuvda maydonga tushib, 6 gol urdi va bir golga uzatma berdi.

Trent «Real»ga oʻtishi oydinlashmoqda

The Athletic ma'lumotiga koʻra, «Real» va Trentning atrofidagilar oʻrtasidagi norasmiy aloqadan keyin himoyachi Madrid klubiga oʻtishga rozilik bildirgan. Ispaniyadagilar Aleksandr-Arnold bilan yanvardayoq dastlabki kelishuvga erishishni istamoqda. Shuningdek, qaymoqranglilar uni yanvardayoq oʻz safiga qoʻshib olish uchun ingliz klubiga 15 million evro toʻlashga ham rozi. Mersisaydliklar esa oʻz tarbiyalanuvchisi bilan shartnomani uzaytirishdan umid qilib, hozircha taklifni rad etmoqda.

«Real» angliyalik futbolchiga kamida 4 yillik shartnoma va transferga rozi boʻlganlik uchun bonus va'da qilmoqda.

Ushbu futbolchi «Liverpul» bilan shartnomasini yangilamayapti va 2025 yil yozida erkin agentga aylanadi. 1 yanvardan u boshqa klublar bilan muzokaralar oʻtkazishi mumkin boʻladi.

Aleksandr-Arnold joriy mavsumda barcha turnirlar doirasida 22 oʻyinda maydonga tushib, 1 gol urgan va 5 golga uzatma bergan.

Krishtianu «An-Nasr»dan ketadimi?

Ispaniyaning Marca nashri shunday xabar tarqatdi. Uning ma'lumotiga koʻra, Ronaldu «An-Nasr» bilan sovrinlar qoʻlga kiritmayotganidan norozi va yaqin vaqtlar ichida klubni tark etish haqida oʻylamoqda — 2025 yil qishida yoki shartnomasi muddati tugaydigan yozda. Portugaliyalik futbolchi faoliyatini yakunlamoqchi emas, shunday ekan, u Evropaga qaytishi mumkin.

OAVda u Parijga kelishi mumkinligi haqida xabarlar tarqalgandi, insayder Fabritsio Romano «PSJ» va u oʻrtasida hech qanday muzokaralar oʻtkazilmayotganini ma'lum qildi.

Bu vaqtda esa Goal tez orada uning «Real»dagi sobiq jamoadoshi Kazemiro Saudiya klubiga oʻtishi va ular yana birgalikda toʻp surishi mumkinligi haqida xabar tarqatgan.

«PSJ» Salohni koʻz ostiga olgan

«Liverpul»ning yozda erkin agentga aylanadigan, 1 yanvardan boshqa klublar bilan muzokaralar oʻtkazish huquqiga ega boʻlgan yana bir futbolchisi Muhammad Saloh Frantsiyaga koʻchib oʻtishi mumkin. Jurnalist Romen Kolle Godendagi ma'lumotlarga koʻra, «PSJ» 32 yoshli misrlikka haftasiga 500 ming evrolik maoshni nazarda tutuvchi uch yillik shartnoma taklif qilishga tayyor.

«Liverpul»ning taklifi esa ikki yillik va maosh miqdori ham kamroq - haftasiga 400 ming evro.

Joriy mavsumda Saloh barcha turnirlar doirasida 26 oʻyinda maydonga tushib, 20 gol urdi va 17 assistni oʻz nomiga yozib qoʻydi. Transfermarkt portali uning qiymatini 55 million evroga baholagan.

Vlahovich «Arsenal»ga oʻtadimi?

Jurnalist Rudi Galettining xabariga koʻra, Dushan Vlahovich «Yuventus»dan «Arsenal»ga oʻtishi mumkin. London klubi 24 yoshli serbni qishki transferlar oynasidagi ustuvor maqsadi sifatida belgilab olgan.

Vlahovichga muqobil variantlar sifatida «Arsenal» «Brentford»dan Brayan Mbeumo, «Bavariya»dan Leroy Sane va Dortmundning «Borussiya» klubidan Jeymi Bayno-Gittensni koʻrmoqda.

Vlahovich turinliklar klubida 2022 yil yanvaridan buyon toʻp surib kelmoqda. Joriy mavsumda u barcha turnirlar doirasida 22 oʻyinda maydonga tushib, 12 gol urgan va ikki golga uzatma bergan. Transfermarkt portali forvardni 60 million evroga baholagan.

Grilish «Tottenhem»ga oʻtishga yaqin

2024 yil Jek uchun muvaffaqiyatsiz kechdi — u yil mobaynida birorta gol urolmadi. Bir necha yil muqaddam 117 million evro toʻlab sotib olingan futbolchi uchun qoʻrqinchli statistika. Grilish Gvardiola tizimida boshqa funktsiyalari bilan foydali ekani tushunarli, ammo raqamlar baribir undagi yaqqol inqirozni namoyon etib turibdi. Qishda u ijara asosida «Tottenhem»ga oʻtishi haqida xabarlar chiqqani bejiz emas. Unga «Nyukasl» ham talabgor.

«Siti» nishonidagi futbolchi «Real»ga oʻtishi mumkin

Martin Subimendi faoliyatini «Real»da davom ettirishi mumkin. As ma'lumotiga koʻra, madridliklar «Real Sosiyedad»ning 25 yoshli yarimhimoyachisini yozda faoliyatini yakunlagan Toni Kroosga oʻrinbosar sifatida koʻrmoqda.

Xabar qilishlaricha, Subimendi transferi ispan grandining yosh ispaniyaliklarni safga qoʻshib olishga urgʻu qaratilgan strategiyasiga ham toʻgʻri keladi. «Real» ushbu kelishuvni hozirda hal qilib, 2025 yil yozida uni safga qoʻshib olmoqchi.

Ushbu futbolchiga bundan oldinroq «Manchester Siti»dan ham jiddiy qiziqish bildirilayotgandi, inglizlar klubi uni Rodriga oʻrinbosar sifatida koʻrmoqda.

Joriy mavsumda Martin «Sosiyedad» safida barcha turnirlar doirasida 21 oʻyinda maydonga tushib, bir gol urgan va bir golga hammualliflik qilgan.

Reshford Saudiya Arabistoniga ketishga rozi boʻlmadi

«Manchester Yunayted» hujumchisi Markus Reshford Saudiya Arabistonining uch klubidan boʻlgan taklifni rad etdi, deb xabar beradi The Times. Ulardan biri — yiliga 35 million funtlik maosh taklif etgandi.

Manba ma'lumotiga koʻra, «MYu» kelajagidan oʻrin olmagan Reshford (klub uni qishda sotishga yoki ijaraga berishga tayyor), hamon Angliya milliy jamoasidan chaqiruv olishdan umid qilmoqda va buning uchun Evropaning kuchli ligalarida toʻp surishi zarurligini tushunib turibdi.

Xuddi shu sababga koʻra, hujumchi Turkiya klublarini ham rad etgan. “Zamin” yangiliklarini “Twitter”da kuzatib boring