Husanovning transfer summasi adolatli boʻlganiga qaramay, bizga alam qilgandi...

Belaruslik futbol mutaxassisi Vladimir Belyavskiy Abduqodir Husanovning “Manchester Siti”ga transferiga munosabat bildirar ekan, legionerimizning ushbu mamlakatdagi faoliyatiga oid qiziqarli ma'lumotlarni ham aytib oʻtdi.

- “Energetik-BGU” va “Lans” oʻrtasida Abduqodir Husanov transferi boʻyicha muzokaralar boshlandi. Oxir-oqibat frantsiyaliklar himoyachini 100 ming yevroga transfer qiladigan boʻldi.

Umuman olib qaraganda, bu arzimagan pul, chunki hech kimga sir emaski, Belarus chempionatini hech kim top-ligalar qatoriga qoʻshmaydi. Garchi bu summa oʻsha paytda adolatli boʻlganiga qaramay, bizga alam qilgandi.

Agar Vladimir Pigulevskiy tirik boʻlganida tadbirkor inson sifatida bu shartnomaga qoʻshimcha yana nimalarnidir undirishi mumkin edi. Lekin uning oʻrniga kelgan odam umuman boshqa soha vakili edi va “Lans” bergan summa unga juda katta koʻrindi. U tezda barcha hujjatlarga imzo chekdi.

Abduqodir Husanov Fransiyada bor salohiyatini namoyish qilganidan keyingina unga Evropaning top-klublari qiziqa boshladi.

Odamlar koʻr emas, Abduqodir Husanov “Energetik-BGU”da oʻynay boshlaganida unga darrov e'tibor qaratishdi. Birinchilardan boʻlib, Georgiy Kondratev Abduqodirni Belarus milliy terma jamoasiga jalb qilmoqchi boʻlgandi va Husanovni Oʻzbekiston milliy terma jamoasi bilan bogʻliqligini aniqlashga kirishdi.

Oʻsha paytda rossiyaliklar ham paydo boʻldi. Biroq ular asosan kuzatuvchi rolini bajardi. Agar oʻyinchi ularga yoqsa, qandaydir sharoitlarni taklif qilish kerak. Ular qoʻllaydigan “futbolchini olamiz, agar oʻynab ketsa, keyin kelishamiz”, degan usullarga hozir hech kim uchmaydi. Chunki keyin ularning birortasini topib boʻlmaydi, - dedi Vladimir Belyavskiy.

Ta'kidlash joizki, Abduqodir Husanov futbolning ilk sir-asrorlarini “Bunyodkor” akademiyasida oʻrgangan. Keyinchalik Belarusga koʻchib oʻtib, yoshi professional shartnoma tuzishga etmagani bois, “Energetik-BGU” safida shunchaki shugʻullanib yurdi.

Keyin 2022-2023 yillar davomida ushbu mamlakat oliy ligasida oʻynab, oʻzini koʻrsatdi. Hamyurtimiz “Energetik-BGU” safida jami 37 ta uchrashuvda ishtirok etib, oʻz hisobiga toʻrttadan gol va assist ham yozdirib qoʻygan.

Abduqodir Husanov xorij klublari e'tiboriga asosan Oʻzbekiston yoshlar terma jamoasi safida Osiyo kubogi va jahon chempionatlaridagi ishtiroki orqali tushdi. “Lans” 2023 yilning yozida hali hech kim tanimaydigan futbolchimizni 100 ming yevro evaziga transfer qildi.

Bir yarim yilda bu transfer oʻzini mutlaq oqladi. “Manchester Siti” oʻndan ziyod da'vogarlarni ortda qoldirish uchun “Lans” himoyachisini 50 million yevroga transfer qilishga qaror qildi.

Abduqodir Husanov “shaharliklar” bilan 2029 yilning yozigacha davom etadigan shartnoma imzolagan. Tomonlarda oʻzaro kelishgan holda hamkorlikni yana bir yilga uzaytirish imkoni bor. “Zamin” yangiliklarini “Telegram”da kuzatib boring