“Roma” bosh murabbiyi Klaudio Raneri oʻzbekistonlik hujumchi Eldor Shomurodovni qoʻyib yuborishni istamayotgan boʻlsa-da, 29 yoshli forvard katta ehtimol bilan Rimni tark etadi.
Rim klubi rahbariyati Shomurodov transferi masalasida bir necha klublar bilan muzokara olib bordi. Xususan, oʻtgan mavsumda legionerimiz bilan hamkorlik qilgan “Kalyari”, joriy chempionatda birinchi golini Eldordan oʻtkazgan “Empoli” uni olish uchun oxirigacha kurashdi.
Italiya matbuotining yozishicha, tajribali oʻyinchi uchun raqobatda “Venetsiya”ning qoʻli baland keldi. Bu klub “Roma” qoʻygan shartni toʻliq qabul qildi. “Venetsiya” yarim yillik ijara muddati tugaganidan keyin Shomurodovni 3,5 million yevroga toʻliq sotib olishga koʻndi.
Biroq venetsiyaliklar yangi hujumchining transferini rasmiylashtirish uchun biroz kutib turishi talab etiladi.
- Shomurodovning transferi “Venetsiya” uchun hal qilingan masaladek tuyulgan edi, biroq “Roma" bu operatsiyani muayyan vaqt toʻxtatib turishga qaro qildi.
Sabab nima?
Sabab – “Roma” Evropa Ligasi doirasida Frankfurtda “Ayntraxt”ga qarshi kechadigan uchrashuv uchun oʻzbek futbolchisidan foydalanish imkoniyatini saqlab qolishni istadi.
Transfer vaqtincha toʻxtatilganiga qaramay, “Venetsiya” bu ishni oxiriga etkazilishiga ishonch bildirishda davom etyapti. Klub transferning barcha shartlarini kelishib boʻlgan. “Roma” mutasaddilari bu savdoni tasdiqlashi bilan Eldor Shomurodov yangi jamoadagi faoliyatiga kirishishi mumkin boʻladi.
Qolaversa, “Roma” rahbariyati Shomurodov oʻrniga Artyom Dovbikka oʻrinbosarlik qiladigan boshqa markaziy hujumchi topishi talab etiladi. Hozircha bir necha futbolchining nomzodi oʻrganilmoqda, - deb yozdi siamolaroma.it sayti eksperti Federiko Tonini.
Ushbu masalani kuzatib kelayotgan ayrim manbalar Eldor Shomurodov ham muntazam oʻyin amaliyotiga ega boʻlish uchun boshqa jamoaga oʻtishni ma'qul koʻrayotganini yozmoqda. Aslida Shomurodov poytaxt klubida qanday oʻyin koʻrsatishi va natija qayd etishidan qat'i nazar asosan zaxiradan maydonga tushirilyapti.
29 yoshli hujumchining zimmasida esa, bu yil Oʻzbekiston milliy terma jamoasini tarixda ilk bor jahon chempionatiga olib chiqish vazifasi turibdi. Bunday vaziyatda terma jamoa sardori va etakchisi klub miqyosida ham muntazam oʻyin amaliyotiga ega boʻlishi har tomonlama manfaatli hisoblanadi.
Demak, tez orada Eldor Shomurodovning anchadan beri mavhum boʻlib turgan kelajagiga oydinlik kiritiladi. Yaxshi yangiliklarni kutamiz... “Zamin” yangiliklarini “Telegram”da kuzatib boring
Ctrl
Enter
Xato topdIngizmi
Iborani ajratib Ctrl+Enter tugmasini bosingMavzuga oid yangiliklar
