Ro‘ziqul Berdiyev "Nasaf"ning yirik g‘alabasi haqida nimalar dedi?

"Nasaf" bosh murabbiyi Ro‘ziqul Berdiyev Superliganing 4-turidan o‘rin olgan "Sho‘rtan" (4:1) bilan o‘yindan so‘ng fikrlarini bildirib o‘tdi.

"Muxlislarni g‘alaba bilan tabriklaymiz. Raqibga ham o‘ynash imkonini berdik. Raqib xatolaridan unumli foydalandik. Fikrimcha, o‘yinni to‘liq nazorat qildik. Ikkinchi bo‘limning dastlabki 15-20 daqiqaligida biroz raqibga to‘p nazoratida ustunlikni berib qo‘ydik deya olaman. O‘sha vaziyatni hisobga olmaganda qolgan daqiqalarda nazorat bizda bo‘ldi", - deydi Ro‘ziqul Berdiyev.

- Alibek Davronov, G‘olib G‘aybullayev, Shuhrat Muhammadiyevni asosiy tarkibga kiritilmasligi taktika bilan bog‘liqmidi yoki jamoaning darajasidan kelib chiqib taktika tanlandimi?
- Jamoaga yordam berishga tayyor ko‘p futbolchilarimiz bor. O‘tgan o‘yinda G‘olibdan foydalangandik. Umar tiklanib bo‘lganidan so‘ng unga imkon berdik. Menimcha vazifasini yaxshi bajarishdi. Sherzod yo‘qligi uchun Sharofni chap qanotga tushirdik. Zafarmurod hozir eng yaxshi holatida va maydonda yaxshi harakat qilyapti. Ko‘p emas 3 ta pozitsiyada o‘zgarish qildik. Futbolchilar har qanday holatda o‘yin amaliyotiga ega bo‘lib turishi kerak. Shu bois bugun boshqa futbolchilarga imkon berdik. Kenjaboyev va Davronov umumiy guruhda shug‘ullanishmoqda. Ular yaqin orada sport formasini yaxshilay oladi.

- Sherzod Nasrullayev haqida ma’lumot bersangiz...
- Sherzod doim nazoratimiz ostida. U umumiy emas, yakka tartibda mashg‘ulotlar olib bormoqda. O‘zi bilan gaplashganimda holati yaxshilanib borayotgani haqida aytdi, o‘ylaymanki, u ham yaqin orada maydonga qaytadi.

- Golbanning penaltiga sababchi bo‘lgan vaziyatiga qanday baho berasiz?
- Men Golbandan bu vaziyatda norozi bo‘ldim, chunki ana shu vaziyatgacha olib kelmaslik kerak edi. O‘sha vaziyatning takrorini ko‘rib chiqamiz, lekin hisob 3:0 payti raqibga bunday imkoniyat berish tajribali himoyachi uchun yaxshimas deb o‘ylayman. Shu uchun bu vaziyatda Igorga biroz tanbeh berdim, chunki bilasiz, hisob 3:0 payti jamoa bo‘shashishi yomon oqibatlarga olib kelishi mumkin. O‘ylaymanki, Igor bunday xatolarni boshqa qilmaydi. “Zamin” yangiliklarini “Telegram”da kuzatib boring