Holand safga qaytdi! "Manchester Siti" muxlislari uchun ajoyib yangilik

"Manchester Siti"ning yetakchi hujumchisi Erling Holand to‘liq tiklanib, jamoaning asosiy tarkibi bilan mashg‘ulotlarga qayta qo‘shildi. Bu haqda Buyuk Britaniyaning bir qator sport nashrlari xabar tarqatdi.

Holand yaqin vaqtgacha jarohatini davolash uchun alohida individual dastur asosida shug‘ullanayotgan edi. Ammo chorshanba kuni norvegiyalik futbol yulduzi umumiy guruh mashg‘ulotlarida qatnashib, muxlislar ko‘nglini xushnud qildi.

Jamoaning bosh murabbiyi Pep Gvardiola ertaga "Vulverhempton" klubiga qarshi APL bahsi oldidan o‘tkaziladigan matbuot anjumanida Holandning maydonga rasmiy o‘yinlarda qaytishi haqida aniq ma’lumot berishi kutilmoqda. Ayniqsa, "shaharliklar" muxlislari bu xabarni intiqlik bilan kutishmoqda.

Eslatib o‘tamiz, Erling Holand Angliya kubogi doirasida "Bornmut"ga qarshi uchrashuvda jarohat olgandi. O‘sha bahsdan so‘ng u stadionni qo‘ltiqtayoq yordamida tark etgan va bu vaziyat jamoa muxlislari orasida xavotirlarga sabab bo‘lgan edi.

Hozirda Holandning safga qaytishi "Manchester Siti" uchun juda muhim ahamiyat kasb etadi. Norvegiyalik goleadorning qaytishi jamoaning hujum chizig‘idagi muammolarini hal qilishi va Pep Gvardiola uchun qo‘shimcha imkoniyatlar taqdim etishi aniq. "Shaharliklar" bu mavsum ham APL va Chempionlar ligasidagi ambitsiyalarini yuqori tutmoqda va bu yo‘lda Holand muhim figura hisoblanadi. “Zamin”ni Telegramʻda oʻqing!