"Real Madrid" David Alaba bilan xayrlashmoqchi. Sabab – jarohat va yuqori maosh

"Real Madrid" klubi tajribali himoyachi David Alaba bilan xayrlashish ehtimoli katta. Bu haqda Ispaniya matbuotida xabar berilmoqda. Ma’lum qilinishicha, 32 yoshli avstriyalik futbolchi klub rahbariyatining ishonchini to‘liq qozona olmagan. Ayniqsa, uning so‘nggi jarohati hamda juda yuqori maoshi klub uchun ortiqcha muammoga aylangan.

Himoyachi aprel oyi oxirida chap tizzasidan jiddiy jarohat olgan va operatsiya qilingan edi. Uning joriy shartnomasi 2026 yil yozigacha amal qiladi, ammo madridliklar uning soliqlar hisobga olinganda yiliga 22,5 million yevrolik yuqori maoshidan xalos bo‘lishni istashmoqda.

David Alaba bu mavsumda "Real" tarkibida bor-yo‘g‘i 14 ta o‘yinda ishtirok etdi. Uning tez-tez jarohatlanishi va yuqori xarajatlari klub rahbariyatini jiddiy o‘ylantirib qo‘ygan. Shu bois, yozgi transfer oynasida klub va futbolchi o‘rtasidagi hamkorlik yakunlanishi ehtimoli yuqori.

Sizcha, "Real" Alaba bilan xayrlashishi to‘g‘ri qaror bo‘ladimi? “Zamin”ni Telegramʻda oʻqing!