Karlo Anchelotti: «Real Madrid»ga bo‘lgan muhabbatim abadiydir»

Ertaga butun futbol olamining diqqati Ispaniya La Ligasining eng muhim to‘qnashuvlaridan biri — «El Klasiko»ga qaratiladi. Unda Karlo Anchelotti boshchiligidagi «Real Madrid» o‘zining ashaddiy raqibi — Xansi-Diter Flik boshqarayotgan «Barselona» bilan mehmonda kuch sinashadi.

Ushbu o‘yin oldidan madridliklarning italiyalik bosh murabbiyi Karlo Anchelotti jamoasiga bo‘lgan cheksiz muhabbati haqida samimiy fikrlarini bildirib o‘tdi.

«Men uchun «Real Madrid» bilan bog‘liq «asal oyi» hech qachon yakunlanmaydi, — deydi Anchelotti. — «Milan» kabi, «Real» ham mening qalbimda alohida o‘rin tutadigan jamoa. Dastlab hammasi oddiy bir ishqibozlik, ehtiros bilan boshlanadi. Ammo vaqt o‘tishi bilan bu his-tuyg‘ular yanada mustahkamlanib, mehr, ishonch va bag‘rikenglik kabi chuqur hislar bilan boyib boradi. Bu hislar esa hayotimning oxirigacha meni tark etmaydi».

Anchelottining fikricha, «Real Madrid» — dunyodagi boshqa klublardan farq qiluvchi o‘ziga xos va alohida jamoa hisoblanadi. Shu bois u har kuni jamoaga nisbatan yuksak hurmat bilan yondashib, unga munosib bo‘lish uchun maksimal darajada harakat qiladi.

«Bu klub — alohida e’tibor, yuksak hurmat va mehrga munosib. Men buni yaxshi his qilaman va har kuni o‘zimdagi barcha imkoniyatlarni ishga solib, bu buyuk klubga munosib bo‘lishga intilaman», — deya ta’kidladi italiyalik murabbiy.

Ma’lumki, Anchelotti «Real» bilan bir necha bor yirik sovrinlarni, jumladan, Chempionlar Ligasi, Ispaniya chempionati va boshqa muhim musobaqalarni yutishga muvaffaq bo‘lgan. Uning boshchiligida «Real Madrid» nafaqat yuqori natijalar, balki ajoyib o‘yin uslubi bilan ham muxlislarning chuqur mehrini qozongan.

Eslatib o‘tamiz, Anchelotti va uning shogirdlari ertaga, 11 may kuni «Barselona»ga qarshi hal qiluvchi bahsda maydonga tushishadi. Bu o‘yinda g‘alaba qozonish «qirollik klubi» uchun katta ahamiyatga ega bo‘lib, turnir jadvalidagi holatni sezilarli darajada yaxshilashi mumkin. Bu o‘yin Ispaniyadagi ikki eng kuchli klubning navbatdagi qizg‘in qarama-qarshiligi sifatida katta qiziqish bilan kutilayapti. “Zamin”ni Telegramʻda oʻqing!