O‘zbekistonlik bokschi Mirazizbek Mirzahalilov "World Boxing" kubogida yarim finalga chiqdi

Polsha poytaxti Varshava shahrida bo‘lib o‘tayotgan nufuzli "World Boxing" tashkiloti kubogi bahslarining ikkinchi bosqichida O‘zbekiston terma jamoasi vakillari ajoyib natijalar qayd etmoqda. Ayniqsa, bugungi bellashuvlarda ringga ko‘tarilgan -55 kg vazn toifasidagi hamyurtimiz Mirazizbek Mirzahalilov o‘zining zafarli yurishini davom ettirib, yarim finalga yo‘l oldi.

Mirzahalilov ushbu bosqichga yetib kelish uchun Uels bokschisi Kory Jones bilan to‘qnash keldi. Hamyurtimiz yuqori mahorat, kuchli texnik va tezkor harakatlari bilan raqibini 5:0 hisobida ishonchli tarzda mag‘lub etdi.

Shu tariqa, Mirazizbek Mirzahalilov O‘zbekiston terma jamoasining kubokdagi muvaffaqiyatli chiqishini yana bir bor tasdiqladi va mamlakatimiz sharafini himoya qiluvchi sportchilarimizning yuqori salohiyatini ko‘rsatdi.

Ma’lumot o‘rnida aytish joizki, oldinda yana bir o‘zbekistonlik iste’dodli bokschimiz Asadxo‘ja Mo‘ydinxo‘jayev o‘zining navbatdagi jangini o‘tkazadi. U Germaniya terma jamoasi vakili Ousainou Hansenga qarshi ringga ko‘tariladi. Bu bellashuv ham qizg‘in va murosasiz o‘tishi kutilmoqda.

O‘zbekiston terma jamoasining kubokdagi bunday zafarli ishtiroklari xalqaro arenalardagi mamlakatimiz sport obro‘sini yanada oshirishi shubhasiz. Boks muxlislari hamda mutaxassislar esa turnir davomida hamyurtlarimizning yanada yuqori natijalarga erishishini kutishmoqda. “Zamin”ni Telegramʻda oʻqing!