Gvardiola: “Chempionlar Ligasi uchun hamon imkoniyat bor”

“Manchester Siti” bosh murabbiyi Xosep Gvardiola jamoaning mavsumdagi natijalari va Chempionlar Ligasi yo‘llanmasi uchun kurash haqida o‘z fikrlari bilan o‘rtoqlashdi. Ispaniyalik mutaxassisning ta’kidlashicha, jamoa ayni paytda muhim bosqichda turibdi va barchasi hali ham o‘z qo‘lida.

“Faqat biz va yana ikkita jamoa sovrin oldik”

“Nyukasl Liga Kubogini, Liverpul esa Premer-ligani yutdi. Biz Superkubokda g‘alaba qozondik. Ammo qolgan top jamoalar mavsumni hech qanday sovrinsiz yakunlamoqda. Bu fakt. Angliya Kubogi finalida yaxshi o‘ynadik, ammo natija bizdan yuz o‘girdi. Futbolda ba’zan shundoq bo‘ladi”, — dedi Gvardiola matbuot anjumanida.

“Chempionlar Ligasi uchun 4 ochko yetarli”

Pepning ta’kidlashicha, jamoa hali ham katta maqsad uchun kurashmoqda:

“Bizning asosiy e’tiborimiz — Chempionlar Ligasiga yo‘llanma. Hozirda bizga 4 ochko kerak, xolos. Bu missiyani bajarish o‘z qo‘limizda. Buni ham futbolchilar, ham muxlislar tushunishi lozim”, — dedi mutaxassis.

Hal qiluvchi bahslar oldinda

36 turdan so‘ng “Manchester Siti” 65 ochko bilan 6-o‘rinda bormoqda. Qolgan ikki turda “shaharliklar” birinchi bo‘lib “Bornmut” mehmoni bo‘ladi — bu bellashuv 21 may kuni bo‘lib o‘tadi. 25 may kuni esa jamoa o‘z maydonida “Fulxem”ni qabul qiladi. Mazkur ikki bahs jamoaning kelasi mavsum Yevropadagi taqdirini belgilab beradi.

Zamin.uz tahririyatidan:
Gvardiolaning so‘nggi bayonotlari jamoada ishonch va motivatsiya hali ham yuqori ekanini ko‘rsatmoqda. Chempionlar Ligasi yo‘llanmasi uchun so‘nggi zarbalarni aniq va ishonch bilan berish “Siti”ning asosiy vazifasiga aylangan. Siz “Siti”ning so‘nggi ikki turdagi imkoniyatlarini qanday baholaysiz? “Zamin”ni Telegramʻda oʻqing!