“Siti” afsonasiga ehtirom: de Bryuyne haykali o‘rnatiladi

“Manchester Siti” klubi tarixida muhim iz qoldirgan Kevin de Bryuyne faoliyatidagi yana bir to‘lqinli sahifa yopildi. Bugungi “Bornmut”ga qarshi APLning 37-turidagi bahs belgiyalik maestro uchun “Etixad”dagi so‘nggi uy o‘yini bo‘ldi. Klub rahbariyati esa unga bo‘lgan e’zozni maxsus haykal bilan ifoda etishga qaror qildi.

“Etixad”dagi sharafli qatorga qo‘shildi

“Manchester Siti” rasman “Etixad Stedium” atrofida Kevin de Bryuyne haykali o‘rnatilishini e’lon qildi. U ushbu sharafga sazovor bo‘lgan yettinchi futbolchiga aylanadi. Avvalroq Vensan Kompani, David Silva, Serxio Aguero, Mayk Sammerbi, Frensis Li va Kolin Bell kabi klub afsonalari haykal bilan abadiylashtirilgan edi.

“Bu mening yuragimda abadiy bog‘lanishni anglatadi”

BBC telekanalida efirga uzatilgan “Match of the Day” dasturida de Bryuyne shunday dedi:

“Bu men doimo ushbu klubning bir qismi bo‘lib qolishimni anglatadi. Qachon oilam va do‘stlarim bilan bu yerga qaytsam, o‘zimni ko‘ra olaman. Demak, men har doim “Siti” bilan birga bo‘laman.”

9 yillik hayot va 19 ta sovrin

Kevin de Bryuyne 2015 yil yozida “Volfsburg”dan “Manchester Siti”ga kelgandi. Shundan beri u klub safida 421ta o‘yinda maydonga tushib, 108 ta gol urdi va 177 ta golli uzatma bilan hamyurtlarini quvontirdi. Bu vaqt mobaynida “shaharliklar” tarkibida 19 ta sovrin qo‘lga kiritdi — jumladan, Chempionlar Ligasi, besh marta APL chempionligi va Angliya Kubogi.

Zamin.uz tahririyatidan:
Kevin de Bryuyne “Manchester Siti” tarixidagi eng ta’sirli futbolchilardan biri bo‘lib qoladi. Uning intellektual o‘yini, yetakchilik qobiliyati va go‘zal paslari uni nafaqat “Siti” muxlislari, balki butun futbol olamida sevimli qahramonga aylantirdi.

Siz nima deb o‘ylaysiz — de Bryuyne afsona sifatida munosib kuzatildi deb o‘ylaysizmi? “Zamin”ni Telegramʻda oʻqing!