“Chelsi” Yevropa chempioni! Mareska va Palmer g‘alaba haqida fikr bildirdi

Yevropa Konferensiyalar ligasi finalida “Chelsi” katta mahorat va tajriba ko‘rsatgan holda “Betis” ustidan 4:1 hisobida yirik g‘alabaga erishdi. Bu natija orqali “Aristokratlar” o‘z tarixlariga yana bir xalqaro sovrinni qo‘shishdi. Ushbu yirik muvaffaqiyatdan so‘ng klub bosh murabbiyi Enzo Mareska va finalda yorqin o‘yin ko‘rsatgan Koul Palmer jurnalistlar savollariga javob berdi.

Enzo Mareska (bosh murabbiy):
— Birinchi bo‘limda o‘zimizdan kutgan o‘yinni ko‘rsatolmadik. “Nottingem Forest”ga qarshi o‘yindan keyingi emotsional chiqishimiz salbiy ta’sir qildi. Lekin ikkinchi taymda jamoa o‘zini yig‘ib oldi va kurashib, natijaga erishdi. Bizda dam olish uchun kam vaqt bo‘ldi, shunga qaramasdan futbolchilar kuchli iroda namoyon etdi.

Mareska ayrim futbolchilar haqida alohida to‘xtalib o‘tdi:

— Ris Jeyms har doim asosiy tarkibda bo‘lishini xohlayman, lekin uni hozircha ehtiyot qilyapman. Malo Gusto yosh futbolchi, xatolari tabiiy. Biz uning o‘sishiga sabr bilan yondashamiz. Uning salohiyatiga ishonaman.

— Bu g‘alaba klub uchun juda muhim. Muxlislarimiz uchun ham shunday. Bu g‘alaba orqali biz yangi bosqichga o‘tamiz. Klub moliyaviy jihatdan katta sarmoya kiritgan, endi esa biz kelgusi mavsum uchun strategiya ustida ish olib boramiz, — deya qo‘shimcha qildi murabbiy.

Koul Palmer (jamoa yetakchisi):
— Finalda ikkita assist bilan jamoamning g‘alabasiga hissa qo‘shdim. Bu mening shaxsiy faoliyatimda unutilmas lahza bo‘ldi. Bunday o‘yinlar orqali o‘zingga bo‘lgan ishonch yanada ortib boradi. Jamoam uchun har qanday pallada yurakdan harakat qilaman.

Palmer finaldagi harakatlari bilan yana bir bor o‘zini yuqori darajadagi o‘yinchi sifatida ko‘rsata oldi. Unga nisbatan muxlislar va tahlilchilarning ishonchi ortib bormoqda.

“Chelsi”ning ushbu g‘alabasi jamoa uchun nafaqat sovrin, balki yangi davr boshlanishi sifatida qaralmoqda. Enzo Mareskaning shijoati va Palmer singari yosh yulduzlarning porlashi “Aristokratlar”ning kelajakdagi yuqori marralarga intilishini yanada ravshan qilib turibdi. Zamin.uz ushbu g‘alabani futbol olamidagi eng muhim voqealardan biri sifatida qayd etdi. “Zamin”ni Telegramʻda oʻqing!