O‘zbekiston – Qatar: “Oq bo‘rilar” Toshkentda hech qachon yutqazmagan

Jahon chempionatiga yo‘llanmani muddatidan oldin qo‘lga kiritgan O‘zbekiston milliy terma jamoasi 10 iyun kuni saralashning so‘nggi turida o‘z maydonida Qatar terma jamoasini qabul qiladi. Bellashuv Toshkentdagi “Bunyodkor” stadionida soat 18:45da boshlanadi.

Mazkur o‘yin yurtimiz futbol jamoatchiligi e’tiborini o‘ziga tortgani bejiz emas. Chunki tarixiy raqamlar va o‘zaro o‘yinlar statistikasiga nazar tashlasak, “Oq bo‘rilar” Qatarga qarshi Toshkentda faqat g‘alaba bilan ishtirok etib kelgan.

Shu kunga qadar O‘zbekiston terma jamoasi poytaxtda Qatarga qarshi jami 6 marotaba maydonga tushgan va ularning barchasida g‘alaba qozongan. Mazkur o‘yinlardan 4 tasi Jahon chempionati saralash uchrashuvlari bo‘lgan bo‘lsa, 1 ta bahs Osiyo Kubogi saralashi doirasida, yana biri esa o‘rtoqlik o‘yini sifatida o‘tkazilgan.

Toshkentdagi tarixiy to‘qnashuvlar:

26.08.2001 — O‘zbekiston – Qatar 2:1
15.11.2006 — O‘zbekiston – Qatar 2:0
28.03.2009 — O‘zbekiston – Qatar 4:0
18.06.2013 — O‘zbekiston – Qatar 5:1
28.03.2017 — O‘zbekiston – Qatar 1:0
16.10.2018 — O‘zbekiston – Qatar 2:0

Shu vaqtga qadar o‘zbekistonlik futbolchilar Qatar darvozasiga 16 ta gol urgan va jami 2 ta gol o‘tkazib yuborishgan. Bunday ustunlik muxlislarimizga yana bir bor ishonch bag‘ishlashi aniq.

Qatar jamoasi uchun esa bu o‘yin pley-off bosqichiga tayyorgarlik nuqtayi nazaridan muhim ahamiyatga ega. Ular bu bahsda natijadan tashqari o‘z taktik va jismoniy holatini sinovdan o‘tkazish imkoniyatiga ega bo‘lishadi.

O‘zbekiston terma jamoasi esa o‘z maydonidagi yuksak statistikani davom ettirish, muxlislar oldida saralash bosqichini g‘alaba bilan yakunlash va jahon chempionatiga yanada yuqori ruh bilan tayyorgarlik ko‘rishni maqsad qilmoqda.

Futbol muxlislari va ekspertlar ushbu bahsni nafaqat natija, balki tarixiy raqobatning yangi sahifasi sifatida ham baholamoqda. “Oq bo‘rilar” bu safar ham an’anani buzmasmi — bu savolning javobi 10 iyun kuni kechqurun aniq bo‘ladi.