Eldor Shomurodov Turkiya klubining taklifini qabul qildimi?

O‘zbekiston milliy terma jamoasining yetakchisi va muxlislarning ardoqli hujumchisi Eldor Shomurodovning faoliyatida yangi sahifa ochildi. Italyan futbolida bir necha yil davomida faol harakat qilgan o‘zbek legioneri endi Turkiya Superligasiga yo‘l olmoqda.

Mashhur italyan insayderi Janluka Di Marsio xabariga ko‘ra, Eldor “Istanbul Bashakshehir” klubining taklifini qabul qildi. Klub va futbolchi o‘rtasidagi kelishuv barcha shartlarda kelishilgan va yaqin vaqt ichida transfer rasman e’lon qilinadi.

Eldor Shomurodov 2021 yildan buyon Italiya A Seriyasida to‘p surib kelayotgandi. U “Jenoa”da o‘zini ko‘rsata olganidan so‘ng, “Roma” kabi yirik jamoa diqqat markaziga tushgan va 19,5 million yevro evaziga Rim klubiga o‘tgan edi. Keyinchalik “Spetsiya” va “Kalyari” jamoalarida ijara asosida to‘p surgan.

Italiyada o‘tkazgan to‘rt mavsumi mobaynida Shomurodov A Seriya doirasida 119 ta o‘yinda maydonga tushdi. Ushbu bahslarda 19 ta gol urdi va 13 ta golli uzatma muallifiga aylandi. Bu natijalar orqali u o‘zini Yevropa futbolidagi chidamli va ko‘p qirrali hujumchi sifatida namoyon etdi.

Turkiyalik mutaxassislar Shomurodovning A Seriyada orttirgan tajribasi, jismoniy baquvvatligi va gol intuitsiyasi Superligaga mos tushishini ta’kidlashmoqda. “Bashakshehir”ning ushbu transferi ham taktik, ham marketing jihatdan klub uchun muvaffaqiyatli qadam bo‘lishi mumkin.

Endilikda barcha ko‘zlar Eldorning yangi klubdagi debyutiga qaratilgan. O‘zbekiston terma jamoasi sardori uchun yangi mamlakat, yangi chempionat va yangi maqsadlar — turk muxlislarining ishonchi va intiqlik bilan kutilgan transferi amalga oshdi. “Zamin”ni Telegramʻda oʻqing!