Eldor Shomurodovni talashyapti: "Renn", "Kremoneze" va yana kim?

Italiya A Seriyasining yangi mavsumi arafasida ko‘plab klublar o‘z tarkiblarini qayta shakllantirish bilan band. Bu jarayonda "Roma" ham chetda qolmadi. Jamoa bosh murabbiyligiga Jan Pero Gasperinining kelishi katta o‘zgarishlarga turtki bo‘ldi. Yakunida beshinchi o‘rin bilan chegaralangan mavsum "rimliklar" uchun yetarli bo‘lmadi, shu bois jamoa faol transfer siyosatini boshladi.

Ayniqsa, muxlislar diqqati markazidagi futbolchilardan biri – Eldor Shomurodov bo‘lib turibdi. O‘zbekiston terma jamoasi hujumchisi "Roma" safiga 2021 yilda qo‘shilgan va shundan beri bir necha bor ijara asosida boshqa klublarda to‘p tepgan. Ammo keyingi mavsum uchun uning taqdiri yana muhokama markazida.

Shomurodov so‘nggi mavsumni "Roma" jamoasida o‘tkazib, murabbiy Klaudio Raneri qo‘l ostida yaxshi o‘yin ko‘rsatdi. Uning faolligi, gol urish qobiliyati va jangovor ruhi yanada ko‘proq jamoalar e’tiborini tortdi.

Ayni paytda Eldorga rasman qiziqish bildirgan klublardan biri — Turkiyaning "Istanbul Bashakshehir" jamoasi. Manbalarga ko‘ra, turklar o‘zbek hujumchisi uchun 8 million yevro atrofida badal puli taklif qilgan. Ammo bu taklifdan keyinroq, Shomurodovga yanada nufuzli ligalardan qiziqishlar ham paydo bo‘ldi.

Jumladan, Fransiya chempionatining faol ishtirokchisi bo‘lgan “Renn” klubi hujumchi uchun muzokaralarni boshlab yubordi. Ular Eldorni jamoaning asosiy tarkib a’zosi sifatida ko‘rishni istamoqda. Fransiya chempionati Yevropa top-5 ligalari qatorida hisoblanadi va bu o‘zbek futbolchisi uchun yangi imkoniyat eshiklarini ochishi mumkin.

Shu bilan birga, Shomurodovning o‘zi Italiya chempionatida qolishni ma’qul ko‘rayotgani ham tilga olinmoqda. Bu holatda A Seriyaning yangi ishtirokchisi “Kremoneze” asosiy da’vogarlardan biriga aylanadi. Garchi klubning sport direktori Simone Jaketta ommaviy ravishda Eldorga qiziqish yo‘qligini bildirgan bo‘lsa-da, insayderlar buni qasddan berilayotgan chalg‘ituvchi bayonot sifatida baholashmoqda. Axborotlarga qaraganda, "Kremoneze" va "Roma" o‘rtasida muzokaralar kechmoqda va ular ijobiy yo‘nalishda davom etmoqda.

Bundan tashqari, "Jenoa" klubi ham bu jarayonni diqqat bilan kuzatib bormoqda. Chunki Shomurodov “Roma”ga o‘tganida, kelishuv shartlariga ko‘ra, uning keyingi transferi uchun 10 foizlik ulush "Jenoa"ga berilishi kerak. Shu bois, genuyaliklar transfer amalga oshishini orziqib kutmoqda.

“Roma” esa hozirda futbolchi uchun rasmiy taklif kelib tushishini kutayotgani aytilmoqda. Fransiyaning "Renn" jamoasi esa tarkibdan kamida bir futbolchini sotish orqali Eldorni xarid qilish imkoniyatini oshirishni rejalashtirmoqda. "Bashakshehir" esa vaqtincha transfer bozorida boshqa nomzodlarga ko‘z tikkan.

Shunday qilib, Eldor Shomurodovning kelajagi hozircha noaniqligicha qolmoqda. Ammo u qaysi klubga o‘tmasin, bu transfer nafaqat uning, balki "Roma", "Jenoa" va bo‘lajak jamoaning rejalariga katta ta’sir ko‘rsatadi. Eldor uchun "Roma"dagi safar nihoyasiga yetayotgandek tuyulmoqda. Ehtimol, u yaqin orada yangi jamoa safida o‘zining yangi sinovlarini boshlaydi.

Qiziqish katta, raqobat kuchli, qaror esa yaqin kunlarda aniqlashadi. Shomurodovning yangi manzili qayer bo‘ladi – Fransiya, Italiya yoki Turkiya? Bu savolga javobni kelgusi kunlar beradi. “Zamin”ni Telegramʻda oʻqing!