“Real”ning bosh murabbiyi "Yuventus"ni yenggan bahsni tahlil qildi

Klublar o‘rtasidagi jahon chempionatida “Real Madrid” o‘z yo‘lini munosib davom ettirmoqda. “Yuventus”ga qarshi o‘tkazilgan o‘yindagi muhim g‘alabadan so‘ng jamoa bosh murabbiyi Xabi Alonso matbuot anjumanida o‘z fikrlarini bildirdi.

Tajribali mutaxassis o‘yindagi umumiy taassurotlari bilan o‘rtoqlashar ekan, jamoasining qayd etgan natijasidan mamnun ekanligini bildirdi.

— Natija va jamoamning harakati menda faqat ijobiy his-tuyg‘ular uyg‘otdi. Birinchi chorak soatdan so‘ng nazorat bizga o‘tdi. Shundan keyin o‘z o‘yinimizni topdik, — dedi Alonso.

Murabbiyning ta’kidlashicha, raqib tomonidan kuchli bosim sezilgan. Ayniqsa, “Yuventus” markazda ustunlikni egallashga harakat qildi va bu qanotlarda ma’lum bo‘shliqlarning paydo bo‘lishiga olib keldi. “Real” esa aynan shu nuqsonlardan unumli foydalangan.

— Biz bugun oson o‘yin o‘tkazmadik. “Yuventus” bizni to‘xtatish uchun taktik jihatdan yaxshi tayyorgarlik ko‘rgan ekan. Ammo futbolchilarim har bir vaziyatda qat’iyat va aql bilan harakat qilishdi. Shu tufayli natijaga erishdik, — deya qo‘shimcha qildi murabbiy.

Endi “Real Madrid”ni yanada mas’uliyatli sinov kutib turibdi. Yarim finalda ular “Borussiya Dortmund” bilan to‘qnash keladi. Bu uchrashuv 5 iyul kuni bo‘lib o‘tishi rejalashtirilgan. Muxlislar esa bu qarama-qarshilikni alohida kutyapti. Chunki ikki jamoa ham yuqori darajadagi o‘yinlar namoyish etib kelmoqda.

“Qirollik klubi”ning bu mavsumdagi maqsadi aniq – unvon uchun oxirigacha kurashish. Hozircha jamoa yo‘nalishni to‘g‘ri tanlagani va har bir o‘yinda yanada yuqori darajaga chiqishga intilayotgani ko‘rinib turibdi.

Zamin.uz sayti orqali musobaqadagi barcha muhim voqealarni kuzatib boring – bizning maqsadimiz sizga eng muhim va qiziqarli yangiliklarni yetkazish! “Zamin”ni Telegramʻda oʻqing!