Bernardu Silvaning “Real”ga o‘tishi nega amalga oshmadi?

Futbol olamida obro‘si va ta’siri yuqori bo‘lgan agentlardan biri — Jorje Mendesh yaqindagina o‘zini yana bir muhim transfer ustida ko‘rsatishga urina boshladi. U bu safar “Manchester Siti” klubida to‘p surayotgan tajribali yarim himoyachi Bernardu Silvani yangi jamoaga o‘tkazish niyatida harakat boshladi, deb xabar berdi donbalon.com.

Ma’lumotlarga qaraganda, Mendesh o‘zining vatandoshi bo‘lgan Silvani Ispaniyaning eng nufuzli klublaridan biri — “Real Madrid” tarkibiga qo‘shish uchun sa’y-harakat qildi. U jamoa prezidenti Florentino Peres bilan to‘g‘ridan to‘g‘ri muloqotga kirishib, Bernarduning xizmatlarini taklif etgan.

Agentning so‘zlariga ko‘ra, “Siti” rahbariyati ushbu futbolchini bu yozda hatto erkin agent sifatida qo‘yib yuborishga tayyorligini bildirgan. Bu esa madridliklar uchun qimmat transfersiz, jahon darajasidagi o‘yinchini olish imkonini anglatar edi.

Biroq bu urinish kutilgan natijani bermadi. Manbalar ta’kidlashicha, “Real” rahbariyati Mendeshning taklifiga jiddiy qiziqish bildirmadi. Yangi bosh murabbiy Xabi Alonso bu transferga qarshi chiqdi va bunga o‘zining aniq sabablarini keltirdi.

Alonsoga ko‘ra, jamoa tarkibini yangilash va yoshlarga yo‘l berish davri boshlangan. 30 yoshni qarshilagan Bernardu Silva esa bu konsepsiyaga mos kelmasligi bois, transferni bloklagan.

Shu bilan birga, Bernarduning “Siti” bilan amaldagi shartnomasi yana bir mavsumgacha davom etadi. Ammo futbolchining o‘zi ham yangi yo‘nalish izlamoqda. Uning jamoa bilan hamkorlikni davom ettirish niyati yo‘q va yangi loyihalarda ishtirok etishga tayyor ekanligi aytilmoqda.

Jorje Mendeshning harakatlari esa hozircha natija bermagan bo‘lsa-da, kelajakda boshqa klublar tomonidan qiziqish bo‘lishi ehtimoli yo‘q emas. Ayniqsa, tajribali futbolchining transfer narxisiz qo‘lga kiritilishi mumkinligi uni jahonning ko‘plab grandlari uchun qiziqarli variantga aylantirishi turgan gap.

Qisqasi, Bernardu Silvaning “Real”da to‘p surish imkoni bor edi — ammo bu imkoniyat jamoani yoshartirish siyosati va rejalar qurboniga aylandi. Muxlislar esa uning keyingi manzili qaysi klub bo‘lishini qiziqish bilan kutmoqda. “Zamin”ni Telegramʻda oʻqing!