“Qirollik klubi” bosh murabbiyligini o‘z qo‘liga olgan Xabi Alonso jamoani shaxsiy qarashlari va uslubiga moslashtirish maqsadida jiddiy islohotlarni amalga oshirishga kirishdi, deb xabar berdi marca.com.
Ispaniyalik mutaxassis bu jarayonda jamoa tarkibini to‘liq qayta ko‘rib chiqmoqda. Alonso Fransiya terma jamoasi safida ham to‘p tepgan chap qanot himoyachisi Ferlan Mendi xizmatlaridan voz kechishni ma’qul topdi. Ya’ni, tajribali himoyachi endi murabbiy rejalariga to‘g‘ri kelmayapti va uning kelajagi “Real”da savol ostida qolmoqda.
So‘nggi ma’lumotlarga ko‘ra, jamoa murabbiylar shtabi chap qanot himoya pozitsiyasini to‘liq yaqinda “Benfika” klubidan taklif etilgan Alvaro Karrerasga ishonib topshirish niyatida. Ushbu qaror natijasida Ferlan Mendi asosiy tarkibdan chetlatilishi ehtimoli kuchaydi va u bu vaziyatda faqat “qurbon” sifatida qolmoqda.
Qizig‘i, Ferlan Mendi o‘tgan mavsumda sog‘ligi bilan bog‘liq muammolar sababli deyarli butun yilni o‘tkazib yuborgan edi. Himoyachining amaldagi shartnomasi 2027 yil yozigacha amal qilishiga qaramasdan, “Real Madrid” rahbariyati hozirning o‘zida uni transfer ro‘yxatiga qo‘shishni maqsad qilmoqda.
Muxlislar uchun bu qaror kutilmagan bo‘lishi mumkin, lekin klub va bosh murabbiy yangi bosqichda yangi g‘oyalar va yosh iqtidorlarga ishonch bildirmoqda. Ferlan Mendining kelajagi esa Yevropa klublari bozorida yangi qiziqishlar uyg‘otishi shubhasiz.
