Kataloniyaning nufuzli "Barselona" klubiga yaqinda qo‘shilgan yosh shvetsiyalik futbolchi Runi Bardji jamoa murabbiylar shtabini haqiqiy hayratga soldi. Diario Sport tarqatgan ma’lumotlarga ko‘ra, bosh murabbiy Xans-Diter Flik va uning yordamchilari vingerning jismoniy tayyorgarligidan juda mamnun. U hozirda jamoa qarorgohiga ajoyib sport holatida yetib kelgan va aksariyat futbolchilardan bir necha pog‘ona oldinda turibdi.
Runi Bardji "Barselona" safiga iyul oyi o‘rtalarida Daniyaning "Kopengagen" jamoasidan 2,5 million yevro evaziga qo‘shilgan edi. Yosh iste’dod o‘zining ilk o‘rtoqlik uchrashuvlaridanoq muxlislar va murabbiylar ishonchini qozondi. U mavsumoldi o‘yinda Yaponiyaning "Vissel Kobe" jamoasiga gol urib, "ko‘k-anorranglilar"ning 3:1 hisobidagi g‘alabasiga hissa qo‘shdi.
Uchrashuv yakunlangach, bosh murabbiy Flik Runi Bardjini asosiy tarkibda ko‘rish niyati borligini ochiq bildirdi. Shvetsiyalik futbolchining tayyorgarligi, maydondagi harakatlari va intizomi murabbiylar shtabini hamda jamoa rahbariyatini ruhlantirmoqda.
"Barselona"ning yangi a’zosi o‘zining ilk mavsumidayoq muvaffaqiyatli natijalar qayd etishga intilmoqda. Muxlislar esa, Bardjining kelgusi o‘yinlarda qanday o‘yin namoyon etishini katta qiziqish bilan kutishmoqda.
