“Manchester Siti” bosh murabbiyi Pep Gvardiola jamoa markaziy yarimhimoyachisi Rodri Ernandesning maydonga qaytishi borasida muxlislarga to‘g‘ridan to‘g‘ri xabar berdi. Ispaniyalik mutaxassis futbolchini ehtiyotlab ishlatishni rejalashtirayotganini ta’kidladi.
“Men Rodridan faqat barqaror va to‘liq holatda bo‘lishini xohlayman. Hozircha u to‘liq formaga qaytmagan. Biroq uning mahorati yoki imkoniyatlariga hech qanday shubham yo‘q. Rodri hali ham dunyoning eng kuchli futbolchisi hisoblanadi. Yangi 'Oltin to‘p' sohibi bir necha oydan keyin aniqlanadi, ammo hozircha eng yaxshi futbolchi deb Rodrini atash mumkin”, — dedi Gvardiola o‘z bayonotida.
Eslatib o‘tish joiz, Rodri oyog‘idan olgan og‘ir jarohatdan keyin jamoasi bilan Klublar o‘rtasidagi jahon chempionatida maydonga tushgandi. Biroq “Al Hilol”ga qarshi bahsda u yana jarohat olib, safdan chiqishga majbur bo‘ldi. Shu sababli ispaniyalik futbolchi sentyabr oyining o‘rtasiga qadar jamoasiga yordam bera olmaydi.
Shu bilan birga, “Siti” uchun Rodrining ahamiyati beqiyos. Uning maydondagi roli — himoya va hujum o‘rtasidagi ko‘prik, jamoaning asosiy tayanchi hisoblanadi. Shuning uchun ham Gvardiola unga ortiqcha shoshmasdan, sog‘lig‘i to‘liq tiklanishini kutib, yana safga qaytarishni maqsad qilgan.
Muxlislar esa Rodrining qaytishini orziqib kutmoqda. Uning maydonda paydo bo‘lishi bilan “Siti” yanada barqaror va kuchli ko‘rinish olishiga ishonishmoqda.
