Kuni kecha yurtimizga portugaliyalik tajribali mutaxassis Paulo Bentu tashrif buyurgani futbol jamoatchiligida katta muhokamalarga sabab bo‘ldi. Ayni paytda barcha nazarlar O‘zbekiston milliy terma jamoasiga qaratilgan — chunki Bentu bosh murabbiy sifatida tayinlanishi mumkinligi haqida jiddiy gap-so‘zlar paydo bo‘ldi.
Biroq, hozirda jamoaga rahbarlik qilib kelayotgan Timur Kapadzening masalasi ochiqligicha qolmoqda. O‘FA bu borada hali rasmiy bayonot bermagani vaziyatni yanada qiziqarli voqeaga aylantirdi.
Ja’far Irismetov mazkur mavzuga munosabat bildirib, o‘z fikrlari bilan o‘rtoqlashdi.
— Nima ham derdik, Bentuni chaqirishibdi. Masharipov aytganidek, rahbariyat shu yo‘lni to‘g‘ri deb bilsa, demak ularcha shu to‘g‘ri, — dedi u. — Biroq Kapadze masalasi ham ko‘tarilyapti. Buni O‘FA rahbarlari hal qilishi lozim.
Savol berildi: Kapadze o‘zi ishini davom ettirishi maqbulmi yoki yangi xorijlik yuqori darajadagi murabbiy kerakmi?
— Bu savolga men emas, balki O‘FA javob berishi kerak. Fikrlar turlicha: Kapadze qolgani yaxshimi yoki chetdan murabbiy kelgani ma’qulmi, balki ikkalasini uyg‘unlashtirish kerakdir? Bu borada mutaxassislar so‘zi hal qiluvchi bo‘ladi, — dedi Irismetov.
Shu bilan birga, u agar xorijlik murabbiy kerak bo‘lsa, kimni tanlashi mumkinligi haqida ham to‘xtaldi:
— Agar tanlash imkoniyati bo‘lsa, men Yurgen Kloppni tanlardim. Chunki uning ish uslubi, jamoaga ruhiy kuch bag‘ishlay olishi juda katta. Har qanchaki o‘zim Gvardiolani ham yaxshi ko‘rsam-da, Kloppga o‘xshagan murabbiy bizga katta turtki berishi mumkin.
Paulo Bentu haqidagi fikrlar ham turlicha. Ja’far Irismetov qo‘shimcha qildi:
— Bentu obro‘li murabbiy. Lekin BAAda katta mablag‘ bo‘lishiga qaramay, u yerda ham katta natija ko‘rsata olmadi. Bir yil ichida katta o‘zgarish qilish qiyin. Vaqt berilsa, uning imkoniyatlarini ko‘rish mumkin. Jahon chempionatiga esa bir yildan kam vaqt qoldi, shu bois ayni paytda uning ishini baholash og‘ir. Avvalo futbolchilarni o‘rganishi uchun ham vaqt talab etiladi.
Mutaxassislar ta’kidlashicha, yaqin kunlarda O‘FAning rasmiy qarori vaziyatga oydinlik kiritadi. Muxlislar esa milliy jamoa boshida kim qolishi yoki kelishi haqida katta qiziqish bilan kutmoqda.
