Timur Kapadze: “O‘yinda kamchiliklar ko‘p bo‘ldi, ammo natijadan xulosa chiqaramiz”

“CAFA Nations Cup-2025” musobaqasida O‘zbekiston milliy terma jamoasi ilk bahsini O‘monga qarshi o‘tkazdi. Toshkentdagi yirik bellashuv 1:1 hisobida durang bilan yakunlandi. Uchrashuvdan keyin jamoa bosh murabbiyi Timur Kapadze va Hojimat Erkinov o‘z fikrlari bilan o‘rtoqlashishdi.

Kapadze o‘yin haqida shunday dedi:

“Uchrashuv biz kutgandek oson kechmadi. Dastlabki daqiqalarda gol o‘tkazib yubordik. Asosiy maqsadimiz raqib darvozasiga gol kiritish edi, ammo imkoniyat yaratishda qiynaldik. Ko‘rdingiz, O‘mon yangi murabbiy ostida harakat qildi va maydonda juda ko‘p kamchiliklarimiz ko‘zga tashlandi”.

Futbolchi Hojimat Erkinov ham o‘yindan so‘ng o‘z fikrini bildirdi:

“Bellashuv kutganimizdan ham og‘ir bo‘ldi. Biroq keyingi bahslarda albatta g‘alaba qozonish uchun barcha kuchimiz bilan harakat qilamiz”.

Matbuot anjumanida qanotlardan berilgan uzatmalar ko‘pligi va uzoq masofadan zarbalarning yo‘qligi haqida savol berilganda, Kapadze shunday javob qaytardi:

“O‘mon juda zich himoyalandi. Shuning uchun markazda imkoniyat deyarli bo‘lmadi. Ikki qanotda bo‘sh zonalar ko‘proq edi va shuni qo‘lladik”.

Baland himoyachilarga qarshi kurash masalasida ustoz qo‘shimcha qildi:

“Aniq aytsam, bizga baland bo‘yli futbolchilar kerak. Raqib termasi 10 kun avval yig‘inga kirishdi va har bir futbolchi yangi murabbiy oldida o‘zini ko‘rsatishga intildi. Bu bizga qiyinchilik tug‘dirdi. Bizda esa ikki kungina yig‘in bo‘ldi, shundan biri tiklanishga qaratilgan edi. Shuningdek, yangi murabbiy kelishi haqidagi mish-mishlar ham diqqatni bo‘lib qo‘ydi. Lekin o‘sha vaziyatdan foydalanib, hisobni tenglashtirdik. Endi e’tiborni keyingi uchrashuvga qaratamiz”.

Jahon chempionati haqida savolga Erkinov shunday javob berdi:

“Rostini aytsam, hali bu haqida o‘ylab ko‘rmaganman. Oldimizda juda ko‘p uchrashuvlar bor. Vaqt yaqinlashgan sari shu masala haqida o‘ylay boshlaymiz”.

Maydon holati va intizom haqida ham fikrlar bildirildi. Erkinov: “O‘yin davomida maydon bilan bog‘liq jiddiy muammo bo‘lmadi. Ikkinchi bo‘limda o‘zimni yanada erkin his qildim”.

Kapadze esa jamoaning umumiy holati haqida:

“Jismoniy jihatdan ham yomon emasdik, motivatsiya ham yetarli edi. Biroq ikki kun davomida ko‘plab futbolchilarning yig‘inga qo‘shilishini kutdik, shu bois to‘liq taktik tayyorgarlikka vaqt yetarli bo‘lmadi. Biz O‘monning sobiq murabbiyi olib borgan o‘yinlarni ko‘rgan edik, ammo Karlush Keyrush boshqacha uslub qo‘lladi va bu ham o‘yinga ta’sir ko‘rsatdi”.

Shu tariqa, termamiz musobaqani durang bilan boshladi. Muxlislar esa keyingi bahslarda jamoaning kuchliroq o‘yinini kutishmoqda.