2026 yilgi U-23 Osiyo kubogi saralash bosqichi “Ye” guruhi bahslari oldidan jamoalarning bosh murabbiylari ishtirokida matbuot anjumani o‘tkazildi.
Unda O‘zbekiston U-23 terma jamoasi ustozi Ravshan Haydarov ham qatnashib, o‘z qarashlarini baham ko‘rdi.
— Avvalo, saralash bosqichi ishtirokchilarini samimiy qutlayman. Ushbu turnir yuksak darajada tashkil etilishiga ishonchim komil. Umid qilamanki, barcha o‘yinlar muxlislar uchun qiziqarli va tomoshabop tarzda kechadi, g‘alaba esa munosib jamoaga nasib etadi, — dedi murabbiy.
Haydarov Qirg‘iziston futbol ittifoqiga ham alohida minnatdorlik bildirdi:
— Bu yerda yuqori saviyadagi tashkilotchilikni ko‘rmoqdamiz. Jamoamiz ham belgilangan reja asosida puxta tayyorgarlikdan o‘tdi. Xozir futbolchilarimiz musobaqaga jismoniy va ma’naviy jihatdan yaxshi holatda kirib keldi, — deya qo‘shimcha qildi u.
Murabbiy tarkib masalasiga ham to‘xtaldi:
— Yoshlar jamoalaridagi o‘yinchilar uchun bu bosqich milliy jamoaga ko‘tarilishda muhim davr hisoblanadi. Ayrim futbolchilarimiz allaqachon asosiy terma safida maydonga tusha boshlagan. Biz ularni yana U-23 jamoasiga chaqirmaslikka harakat qilamiz. Chunki asosiy vazifamiz – milliy jamoaga kuchli va iqtidorli futbolchilarni yetkazib berish. Masalan, ilgari yoshlar safida o‘ynagan Abduqodir Husanov va Abbos Fayzullayev bugun milliy termada o‘z o‘rniga ega. Biz uchun eng asosiy maqsad — yoshlarga imkoniyat yaratib berish, ularni katta futbolga tayyorlashdir, — dedi Haydarov.
Eslatib o‘tamiz, O‘zbekiston U-23 terma jamoasi Bishkekda bo‘lib o‘tadigan saralash bahslarida maydonga tushadi. Yigitlarimiz 3 sentyabr kuni Shri-Lankaga, 6 sentyabr kuni Qirg‘izistonga va 9 sentyabr kuni Falastinga qarshi o‘ynashadi. Avvalroq murabbiy tarkibni ham e’lon qilgan edi.
