"Tottenxem"ning sobiq bosh murabbiyi Ange Postekoglu yaqin vaqtlarda yana ishga kirishishi mumkin. Hozirda 59 yoshli avstraliyalik mutaxassis xizmatlariga ikki katta klub — Germaniyaning "Bayer"i va Turkiyaning "Fenerbaxche"si jiddiy qiziqish bildirmoqda.
Ma’lumki, "Bayer" Germaniya chempionatidagi omadsiz startdan so‘ng Erik ten Xag bilan yo‘llarni ajratgan edi. Shu bilan birga, "Fenerbaxche" ham tajribali portugaliyalik murabbiy Joze Mourinyu bilan shartnomani bekor qilishga qaror qilgandi.
Ange Postekoglu esa o‘tgan mavsum yakunida "Tottenxem"ni tark etganidan keyin ishsiz qolmoqda. Biroq uning nomzodi Yevropada hamon yuqori baholanmoqda. Avstraliyalik mutaxassis 2024/25 yilgi mavsumda londonliklar bilan Yevropa Ligasida g‘olib chiqqan va katta e’tibor qozongandi.
Hozirgi vaziyatda "Bayer" ham, "Fenerbaxche" ham jamoalarini qayta qurish va yuqori maqsadlarga yetaklaydigan murabbiy izlamoqda. Shu bois Postekogluning tajribasi va yutuqlari uni ikki klub uchun ham jozibali variantga aylantirgan.
Endi barcha savol — avstraliyalik mutaxassis qayerda faoliyatini davom ettirishni tanlaydi, degan qiziqishga qaratilgan. Muxlislar esa yaqin kunlarda bu masala bo‘yicha aniq qaror chiqishini kutishmoqda.
“Zamin”ni Telegramʻda oʻqing!
