Italiya chempionati – A Seriyada avgust oyining eng yaxshi futbolchisi bo‘lish uchun nomzodlar aniqlandi. Bu borada rasmiy ro‘yxatdan jami 6 nafar yorqin o‘yinchi o‘rin oldi.
Ulardan har biri o‘tgan ikki tur davomida jamoasi uchun muhim o‘yin namoyish qilib, statistik ko‘rsatkichlari bilan ham ishqibozlar va mutaxassislar e’tiborini qozondi. Quyida nomzodlar haqida batafsil ma’lumot keltiriladi:
🔹 Tomas Kristensen («Udineze») – ikki bahsda maydonga tushib, 1 ta gol urdi. Uning uzatmalar aniqligi 88,2 foizni tashkil etdi. Shuningdek, yakkakurashlarda 69 foiz samaradorlikka erishdi.
🔹 Skott Maktominay («Napoli») – 2 o‘yinda ishtirok etib, 1 ta gol kiritdi. Uning uzatmalar aniqligi 89,3 foiz bo‘lib, yakkakurashlardagi g‘alabalari 43 foizni tashkil qildi.
🔹 Niko Pas («Komo») – yosh futbolchi 2 bahsda 1 ta gol va 1 ta assist bilan ajralib turdi. Uning uzatmalar aniqligi 75,3 foiz, duellarda esa 43 foiz samaradorlik qayd etildi.
🔹 Matias Soule («Roma») – rimliklarning yosh yulduzi ikki o‘yinda 1 ta gol urdi. Uning uzatmalar aniqligi 79,5 foiz bo‘lib, yakkakurashlarda 50 foiz ko‘rsatkich qayd etdi.
🔹 Markus Tyuram («Inter») – fransiyalik hujumchi avgust oyida eng ko‘zga ko‘ringan nomzodlardan biri. 2 uchrashuvda 2 ta gol va 1 ta assist bilan qayd etildi. Uning paslar aniqligi 82,9 foiz, duellarda esa 50 foiz samaradorlik ko‘rsatdi.
🔹 Kenan Yildiz («Yuventus») – turk forvardi ikki bahsda 2 ta assist amalga oshirdi. Uning uzatmalar aniqligi 82,5 foizga teng bo‘lib, yakkakurashlardagi samaradorligi 67 foizga yetdi.
Avgust oyidagi ushbu ko‘rsatkichlardan keyin muxlislar va ekspertlar tomonidan qaysi futbolchi eng yaxshi sifatida tan olinishi jiddiy qiziqish uyg‘otmoqda. Shu bilan birga, nomzodlar orasidagi raqobat juda keskin kechishi ham aniq.
“Zamin”ni Telegramʻda oʻqing!
