Xabaringiz bor, Angliyaning Liverpul shahrida World Boxing rahnamoligida ilk bor kattalar o‘rtasida jahon chempionati o‘tkazilmoqda. Bu nufuzli musobaqa dunyo boksida yangi tarixiy sahifa ochayotgani bilan birga, o‘zbek sportchilari uchun ham katta imkoniyat yaratib bermoqda.
Shu yilgi chempionat doirasida ringga chiqqan hamyurtimiz Abdumalik Xalokov -60 kg vazn toifasida turkiyalik Mehmetxan Chinarga qarshi jang qildi. Juda kuchli va shiddatli kechgan bellashuvda o‘zbek bokschisi katta ustunlik ko‘rsatib, hakamlar yakdil qaroriga ko‘ra 5:0 hisobida g‘alaba qozondi.
Xalokovning mahoratli harakatlari va aniq zarbalari raqibini deyarli imkoniyatsiz qoldirdi. Jang davomida u o‘zining tajribasi va texnik ustunligini to‘liq namoyon etdi. Shu tariqa, u keyingi bosqichga yo‘l olib, chempionlik yo‘lida yana bir qadam tashladi.
Ma’lumot uchun, chempionning keyingi bahsi 8-sentyabr kuni bo‘lib o‘tadi. Boks ishqibozlari ushbu jangni katta intizorlik bilan kutishmoqda.
O‘zbekiston boks federatsiyasi ta’kidlaganidek, bu g‘alaba nafaqat Xalokovning shaxsiy yutug‘i, balki o‘zbek boksi maktabi nufuzini yanada yuksaltirdi. Bugungi kunda yurtdoshlarimiz xalqaro musobaqalarda munosib ishtirok etib, Vatan bayrog‘ini baland ko‘tarib kelmoqda.
“Zamin”ni Telegramʻda oʻqing!
