Osiyo futbolidan Yevropaning yetakchi chempionatlariga yo‘l topib, o‘z salohiyatini ko‘rsatayotgan futbolchilar soni ortib bormoqda. Ular orasida esa yurtimiz vakili Abduqodir Husanov ham bor.
Husanovning katta transferi
O‘zbekiston milliy terma jamoasining markaziy himoyachisi Abduqodir Husanov 2025-yil 20-yanvar kuni Fransiyaning “Lans” klubidan Angliya grandi — “Manchester Siti”ga yo‘l oldi. Bu ko‘chish yilning eng shov-shuvli transferlaridan biri sifatida qayd etildi.
Hozirgi kunda 21 yoshli himoyachi Xosep Gvardiola qo‘l ostida o‘zini namoyon qilishga intilayapti. “Siti”da tarkib qisqartirilayotgan vaqtda Abduqodirning jamoada qoldirilgani uning klubda qanchalik muhim o‘rin egallab borayotganini ko‘rsatadi.
Ramziy jamoadagi o‘rni
Futbol dunyosida nufuzli manba sanaladigan score90.com sayti ekspertlari qit’alar bo‘yicha eng kuchli futbolchilardan ramziy terma jamoalar tuzdi.
Osiyo davlatlaridan tuzilgan ramziy jamoada Abduqodir Husanov ham bor. E’tiborlisi, ushbu tarkibga faqat uch mamlakat — Yaponiya, Janubiy Koreya va O‘zbekiston vakillari kiritildi.
Ramziy tarkib quyidagicha shakllandi:
- Darvozabon: Sion Suzuki (“Parma”, Yaponiya, 20 mln yevro)
- Himoyachilar: Xiroki Ito (“Bavariya”, Yaponiya, 25 mln yevro), Min Jay Kim (“Bavariya”, Janubiy Koreya, 40 mln yevro), Abduqodir Husanov (“Manchester Siti”, O‘zbekiston, 35 mln yevro), Takexiro Tomiyasu (“Arsenal”, Yaponiya, 18 mln yevro)
- Yarim himoyachilar: Ritsu Doan (“Ayntraxt”, Yaponiya, 25 mln yevro), Vatar-u Endo (“Liverpul”, Yaponiya, 8 mln yevro), Kan In Li (“Pari Sen-Jermen”, Janubiy Koreya, 25 mln yevro)
- Hujumchilar: Kaoru Mitoma (“Brayton”, Yaponiya, 40 mln yevro), Son Xyon Min (“Los Anjeles”, Janubiy Koreya, 20 mln yevro), Takefuso Kubo (“Real Sosedad”, Yaponiya, 30 mln yevro)
Husanovning yo‘li
Abduqodir Husanov o‘zining professional faoliyati davomida Belarusning “Energetik-BGU”, Fransiyaning “Lans” va Angliyaning “Manchester Siti” klublari sharafini himoya qildi. U “top-5” liga tarkibida ikki mamlakat chempionatida o‘ynagan yagona o‘zbek futbolchisi sifatida tarixga kirdi.
Xulosa
Husanovning ramziy jamoaga kiritilishi uning qanchalik nufuzli futbolchiga aylanayotganidan darak. Yurtimiz sharafini Yevropada munosib tarzda himoya qilayotgan bu yigit Osiyo futbolining ham eng kuchli vakillari qatorida e’tirof etilmoqda.
“Zamin”ni Telegramʻda oʻqing!
