Rossiya Federatsiyasi Sport vazirligiga Sankt-Peterburg Qonunchilik Assambleyasi deputati Aleksey Sivilev noodatiy taklif bilan chiqdi. Unga ko‘ra, fuqarolar har bir bosib o‘tilgan kilometr uchun pul mukofoti olishlari mumkin. Deputat o‘z fikrlarini shaxsiy Telegram sahifasida bayon qilgan.
Sivilevning ta’kidlashicha, yangi sport inshootlari qurilishi aholining jismoniy faolligini kuchaytirishga yetarli emas. Uningcha, eng kuchli motivatsiya — bu moliyaviy rag‘bat. “Biz sog‘lig‘iga e’tibor qaratayotgan millionlab odamlarni qo‘shimcha sarf-xarajatsiz qo‘llab-quvvatlashimiz lozim. Ko‘chalarni yopish yoki milliardlab mablag‘ talab qiladigan loyihalarsiz ham bunga erishish mumkin”, — deydi u.
Deputat taklif qilayotgan konsepsiya SportID tizimi orqali amalga oshirilishi mumkin. Unda foydalanuvchilar o‘z mashg‘ulotlarini qayd etib boradilar va evaziga bonuslar olishadi. Bu mukofotlarni sport anjomlari va oziq-ovqat mahsulotlariga chegirmalarga, sport zallari va basseynlarga a’zolik narxini kamaytirishga, havaskor musobaqalariga arzonroq qatnashish imkoniyatiga yoki tibbiy sug‘urta polislariga chegirmalarga almashtirish mumkin bo‘ladi.
Hozircha SportID qanday ishlashi to‘liq aniqlashtirilmagan. Ehtimoliy variantlardan biri — xizmatni “Davlat xizmatlari portali” bazasida joriy etish. Bu yerda fuqarolarning shaxsiy raqamli profillari orqali faoliyatni nazorat qilish rejalashtirilmoqda. Sivilev, shuningdek, ushbu tashabbusni Sog‘liqni saqlash va Raqamli rivojlanish vazirliklariga taqdim etib, maxsus ishchi guruh tuzilganini ma’lum qildi.
“Zamin”ni Telegramʻda oʻqing!
