«Manchester Yunayted» jamoasining bosh murabbiyi Ruben Amorim katta derbi oldidan jurnalistlar savollariga javob qaytardi. Suhbat davomida u o‘zini Xosep Gvardiola bilan taqqoslash haqida fikr bildirib, bunday qarashni mutlaqo o‘rinsiz deb hisoblashini ochiq aytdi.
«Menga tushayotgan bosimni Gvardiolaning holati bilan solishtirish kulgili tuyuladi. U doimo yutib kelgan va hatto g‘alaba qo‘lga kirita olmasa ham o‘zini erkin his qiladi. Men esa bu yerda har kuni haqiqatan ham kuchli murabbiy ekanimni isbotlashim shart. Shu jihat men uchun katta mas’uliyat, lekin ayni paytda bu menga kuch va ishtiyoq ham beradi», – dedi Amorim.
Murabbiyning so‘zlariga ko‘ra, jamoada hali ham yechilmagan jiddiy masalalar mavjud. Ammo ularning ustida ish olib borilmoqda. «Albatta, ba’zida jahlimiz chiqadi, xafaliklar ham bo‘ladi. Shunga qaramay, biz har doim muammolarni bartaraf etishga harakat qilamiz», – deb ta’kidladi u.
Amorim shuningdek, jamoaning so‘nggi o‘yinlarda ancha o‘sish ko‘rsatganini qayd etdi. Uning fikricha, asosiy masala imkoniyatlarni samaraliroq ishlatish va ko‘proq g‘alabalarni qo‘lga kiritishdir. «Shunda barcha jarayonlar ham ancha oson kechadi», – deya qo‘shimcha qildi «Yunayted» murabbiyi.
Shunday qilib, derbi oldidan Amorimning maqsadi aniq – jamoani yanada kuchli va g‘alabaga intiq qila olish. Uning o‘zi aytganidek, hozirgi bosim unga to‘siq emas, aksincha yanada kuchliroq bo‘lishga undaydi.
“Zamin”ni Telegramʻda oʻqing!
