Braziliya milliy terma jamoasini 2026 yilgi jahon chempionatiga tayyorlayotgan mashhur italiyalik mutaxassis Karlo Anchelotti o‘zining uzoq yillar davomida to‘plagan tajribasi va shogirdlari haqida fikr bildirdi. Uning so‘zlariga ko‘ra, faoliyati davomida ishlatgan eng nufuzli va jahon darajasidagi futbolchilar ro‘yxati ancha boy.
“Men bosh murabbiy sifatida ishlash davomida juda ko‘p iste’dodli o‘yinchilar bilan hamkorlik qildim. Lekin eng yorqinlar qatoriga Ronaldo, Krishtianu Ronaldu, Kaka, Toni Kroos, Vinisius Junior, Luka Modrich hamda Dide Drogbani qo‘yishim mumkin. Ular haqiqiy maydon ustalari edi”, — dedi Anchelotti o‘z bayonotida.
66 yoshli tajribali murabbiyning faoliyati Yevropa futbolidagi eng nufuzli klublar bilan chambarchas bog‘liq. U “Yuventus”, “Milan”, “Napoli”, “Chelsi”, “Everton”, “Pari Sen-Jermen”, “Bavariya” hamda “Real Madrid” klublarida ishlagan va har bir jamoada o‘z izini qoldirgan.
Anchelotti faoliyati davomida jami 31 ta turli sovrin va kuboklarni qo‘lga kiritdi. Bu ko‘rsatkich uni zamonaviy futbolning eng muvaffaqiyatli murabbiylaridan biri sifatida namoyon qiladi. Uning rahbarligida jamoalar milliy chempionatlardan tortib xalqaro turnirlargacha bir qator yuksak natijalarga erishishdi.
O‘tgan yozda “Real” klubidagi lavozimini topshirgan Anchelotti yangi chaqiriq sifatida Braziliya milliy terma jamoasi bilan ishlashni ma’qul topdi. Hozir u yangi avlod futbolchilari bilan ishlab, ularni 2026 yilgi Jahon chempionatida muvaffaqiyat qozonishga tayyorlamoqda.
Mutasaddilar fikricha, Anchelottining katta tajribasi va mashhur futbolchilar bilan ishlagan mahoratlari braziliyaliklarga katta turtki berishi mumkin. Muxlislar esa uning qo‘l ostida yangi sovrinli sahifalar yaratilishiga ishonch bilan qaramoqda.
“Zamin”ni Telegramʻda oʻqing!
