«Buxoro» klubi rasmiy matbuot xizmati ma’lumot tarqatdi: jamoa rahbariyati bosh murabbiylik vazifasini rossiyalik mutaxassis Aleksandr Xomyakovga topshirdi.
Klub bayonotida aytilishicha, yangi murabbiyning futboldagi ko‘p yillik tajribasi va bilimlari jamoaga yangi marralarni egallashda yordam berishiga ishonch bildirilgan. «Biz oldinda turgan mas’uliyatli bahslar, jiddiy sinovlar va muxlislar kutayotgan muhim g‘alabalarga tayyorlanayapmiz», — deyiladi xabarda.
Shu bilan birga, Xomyakovning «Buxoro» bilan qancha muddatga shartnoma imzolaganligi yoki kelishuv tafsilotlari haqida hozircha ma’lumot berilmadi.
Ma’lumki, o‘tgan oy klubda bosh murabbiylikni Ulug‘bek Bakayev tark etgan edi. Shu vaqtga qadar jamoani vaqtinchalik ravishda Viktor Karpenko boshqarib keldi. Endi esa «Buxoro» yangi sahifani Aleksandr Xomyakov qo‘l ostida boshlaydi.
Muxlislar uchun eng qiziq jihati — yangi murabbiy jamoaning imkoniyatlarini qay darajada ochishi va natijalarni qay yo‘nalishga burishi. «Buxoro» futbolchilari oldida endi yangi maqsadlar va kutilgan g‘alabalar turibdi.
“Zamin”ni Telegramʻda oʻqing!
