Rossiyalik MMA jangchisi Arman Sarukyan UFCning yengil vazn chempioni Iliya Topuriya haqida o‘z fikrlarini bildirdi. Uning ta’kidlashicha, Topuriya tashkilotda uzoq vaqt chempionlik maqomini saqlab qolishi qiyin.
“Men uchun asosiy vazifa — UFC kimni raqib qilib qo‘ysa, o‘sha bilan jang qilish. Kamargacha yo‘lda kim to‘g‘ri kelsa, barchasi bilan to‘qnashishga tayyorman. Ammo fikrimcha, Iliya Topuriya uzoqqa bormaydi. U katta pul va katta shou janglarini istayapti. Masalan, u boksga o‘tib, Terens Kroufordga qarshi jang qilish haqida o‘ylayapti. Shu sababdan u ehtimol bir marta kamarini himoya qiladi va keyin undan voz kechishi mumkin”, — dedi Sarukyan “Match TV”ga bergan intervyusida.
Shu bilan birga, Sarukyan yaqin vaqt ichida Islom Maxachev bilan jang bo‘lishi katta ehtimol emasligini ham ta’kidlab o‘tdi. Uning so‘zlariga ko‘ra, Topuriyaning chempionlik mavqei UFC uchun moliyaviy va shou jihatdan qiziq, ammo u o‘z maqsadini tez orada o‘zgartirishi mumkin.
MMA jamoatchiligi orasida ham Topuriyaning kelajagi haqida turli fikrlar bildirilmoqda. Ayrimlar uning texnik jihatdan kuchliligini ta’kidlasa, boshqalar uning moliyaviy manfaatlar ortidan ketishi uni UFCdan uzoqlashtirishi mumkinligini aytishmoqda.
“Zamin”ni Telegramʻda oʻqing!
