Madridning mashhur klubi «Real» Ispaniya La Ligasi 5-turidan o‘rin olgan bahsda «Espanol»ni 2:0 hisobida mag‘lub etdi. Bu g‘alaba nafaqat jamoa uchun, balki bosh murabbiy Xabi Alonso uchun ham tarixiy ahamiyat kasb etdi. Opta Sports tarqatgan ma’lumotlarga ko‘ra, u madridliklar tarixida ilk beshta chempionat o‘yinida ketma-ket g‘alaba qozongan uchinchi murabbiyga aylandi.
Tarixga nazar tashlasak, bu ko‘rsatkichga faqat ikki murabbiy erishgan edi. Birinchi holat 1928/29 yilgi mavsumda qayd etilgan, o‘shanda Xose Quirante «Real»ni shunday natijaga olib chiqqan. Oradan qariyb yetmish yil o‘tib, 2004/05 yilgi mavsumda Vanderley Lyuksemburgo ham shunday muvaffaqiyatga erishgandi. Endi esa Xabi Alonso ushbu sharafli ro‘yxatga qo‘shildi.
Alonso shogirdlari joriy mavsumda nafaqat g‘alabalar bilan, balki samarali va jozibali o‘yini bilan ham muxlislarning ishonchini qozonmoqda. «Espanol» ustidan qozonilgan so‘nggi g‘alaba jamoaning ochkolarini 15 taga yetkazdi va madridliklar jadvalning mutlaq peshqadamiga aylandi.
Hozirgi kunda asosiy raqib sanaladigan «Barselona» esa bitta o‘yini kam bo‘lishiga qaramasdan, atigi 10 ochko jamg‘argan. Bu esa muxlislar orasida La Ligadagi yangi mavsum intrigasi haqida katta muhokamalarga sabab bo‘lmoqda.
Alonso uchun esa bu g‘alabalar shaxsiy muvaffaqiyatdir. U butun dunyoda hurmatga sazovor bo‘lgan sobiq futbolchi sifatida endi murabbiylik yo‘lida ham o‘z so‘zini qat’iy ayta boshladi. «Real» tarixidagi bunday start unga katta ishonch bag‘ishlamoqda va jamoa oldida katta maqsadlar turgani shubhasiz.
“Zamin”ni Telegramʻda oʻqing!
