Portugaliya termasining sobiq yetakchi futbolchisi Manishe Krishtianu Ronalduning karerasi va uning tarixiy maqsadlari haqida fikr bildirdi. Unga ko‘ra, Ronalduda 1000ta gol urish uchun yetarli kuch-quvvat, salohiyat va professionallik mavjud.
Manishening aytishicha, hozirgi paytda Ronalduga ushbu rekordni o‘rnatish uchun bor-yo‘g‘i 56ta gol yetishmaydi. «Saudiya Arabistoni chempionatida u bir mavsumda kamida 30ta gol urishga qodir. Demak, ikki mavsum ichida u 1000ta gol chegarasini zabt etishi mumkin», – deydi sobiq yarim himoyachi.
Uning fikricha, Saudiya chempionati Yevropaning yetakchi ligalari darajasida kuchli emas va bu holat Ronalduning shaxsiy statistikasi uchun qulay imkoniyat yaratadi. «Ronaldu — professional futbolchi. Unda intizom, iroda va hech narsadan qaytmaydigan xarakter bor. Shu sababli u uchun ilojsiz ishning o‘zi yo‘q», – deya qo‘shimcha qildi Manishe.
Ma’lumot uchun, Ronaldu bugungi kunda dunyo futboli tarixida eng ko‘p gol urgan futbolchilardan biri hisoblanadi. Uning rekordlari va ishtiyoqi hali-hanuz barqarorligi bilan hayratga solmoqda. Agar Manishening taxmini rost bo‘lsa, Ronaldu yaqin ikki mavsum ichida futbol tarixida misli ko‘rilmagan yutuqka erishgan ilk futbolchi sifatida tilga olinishi mumkin.
“Zamin”ni Telegramʻda oʻqing!
