“Manchester Siti” bosh murabbiyining sobiq yordamchisi Karlis Planchart Pep Gvardiolaga yangi chaqiriqqa yo‘l olishni tavsiya qildi. 2016-yildan buyon Angliyada ishlayotgan kataloniyalik mutaxassis “shaharliklar” bilan 18 ta sovrinni qo‘lga kiritib, klub tarixidagi eng yorqin davrni yaratdi. Shartnomasi 2027-yilgacha amal qiladi.
Planchartning ta’kidlashicha, “har qanday loyiha 5–6-yildan uzoqqa cho‘zilmasligi kerak, shundan keyin yangi havo va tetiklanish zarur. Do‘st sifatida unga boshqa jamoada o‘zini sinab ko‘rishni maslahat beraman, chunki Pep hali juda ko‘p ish qila oladi”, — dedi u “Sport” nashriga.
Gvardiola esa oldinroq faoliyatini yakunlashdan avval milliy terma jamoani boshqarib, yirik forumda qatnashish orzusini bildirgan: “Jahon yoki Yevropa chempionatida terma jamoani qabul qilishni istayman. Qaysi yurt ekanini bilmayman, ammo bunday imkoniyatni xohlardim”, — degan edi u.
Pep “Barselona” va “Bavariya”da katta yutuqlarga erishganidan keyin Angliyada ham hukmronlik o‘rnatdi: 6 marta Premer-liga chempioni, 2 ta Angliya Kubogi va 4 ta Liga Kubogini qo‘lga kiritdi. 2022/23 mavsumida esa tarixiy natija qayd etildi — ilk bor Chempionlar ligasi sovrini va “trebl”.
Hozircha Gvardiola “Etihad”da qoladi va titullar sonini yanada ko‘paytirishni maqsad qilgan. Biroq sobiq yordamchining gaplari Pepning kelajagi haqidagi munozaralarni yana jonlantirdi: yangi saf—yangi sinovmi yoki “Siti”dagi shukuhini davom ettirishmi? Javobini vaqt ko‘rsatadi.
“Zamin”ni Telegramʻda oʻqing!
