O‘zbekiston milliy terma jamoasi bosh murabbiyi Fabio Kannavaro o‘z murabbiylar shtabi bilan birgalikda Qashqadaryo viloyati futbol akademiyasiga tashrif buyurdi. Uning tashrifi yoshlar futboli rivojiga bo‘lgan e’tibor ramzi sifatida baholandi.
Kannavaro va uning hamkasblari akademiyadagi infratuzilma, mashg‘ulot maydonlari va yosh futbolchilar uchun yaratilgan sharoitlar bilan yaqindan tanishdi. Ular mashg‘ulot jarayonlarini kuzatib, murabbiylar ish uslubini ham tahlil qilishdi.
Taniqli italiyalik mutaxassis yosh futbolchilar bilan suhbatda o‘z tajribasidan kelib chiqib, samarali o‘quv mashg‘ulotlari va kasbiy o‘sish uchun muhim maslahatlar berdi. U har bir yosh sportchidan intizom, mehnatsevarlik va sabr talab etilishini alohida ta’kidladi.
“Futbolda muvaffaqiyat faqat talant bilan emas, balki uzluksiz mehnat bilan qo‘lga kiritiladi. Har bir mashg‘ulotda o‘z ustingda ishlasang, natija albatta keladi”, — dedi Kannavaro yoshlarga murojaat qilib.
Tashrif davomida murabbiylar shtabi akademiya rahbariyati bilan ham uchrashdi. Suhbatda futbolchilarni tayyorlash tizimi, ilg‘or yechimlar va milliy terma jamoa uchun iqtidorli yoshlarni saralash masalalari muhokama etildi.
Kannavaro tashrif yakunida yoshlarga futbolni nafaqat sport, balki hayot maktabi sifatida qabul qilishni tavsiya etdi. “Haqiqiy futbolchi bo‘lish — bu nafaqat o‘yinda, balki maydondan tashqarida ham mas’uliyatli bo‘lishni anglatadi”, — dedi u.
Akademiya vakillari Italiyalik mutaxassis tashrifini yoshlar uchun katta motivatsiya deb baholadilar. Ularga ko‘ra, Kannavaroning qo‘llab-quvvatlov so‘zlari yosh futbolchilarning ishtiyoqini yanada oshirdi.
Bu tashrif milliy terma jamoa rahbariyatining yoshlar bilan ishlashga bo‘lgan jiddiy munosabatini namoyon etdi. Qashqadaryo akademiyasida bo‘lgan uchrashuv nafaqat futbolchilar, balki murabbiylar uchun ham qimmatli tajriba bo‘ldi.
“Zamin”ni Telegramʻda oʻqing!
