Jahon futboldi afsonasi, Fransiya terma jamoasi sobiq yetakchisi Zinedin Zidan ideal futbolchi qanday bo‘lishi kerakligini tasvirlab berdi. Uning ta’rificha, orzudagi futbolchi eng mashhur va iste’dodli charm to‘p ustalarining eng yaxshi jihatlarini o‘zida mujassam etgan bo‘lishi lozim.
Zidan o‘zining shaxsiy sevimli o‘yinchilari asosida “super futbolchi” modelini shakllantirgan:
Chap oyoq — Zinedin Zidan.
O‘ng oyoq — Zinedin Zidan.
Bosh bilan o‘ynash — Zinedin Zidan.
Kuch-quvvat — Zlatan Ibragimovich.
Dribling — Alessandro Del Piero.
Hujumni yakunlash — Ronaldo yoki Krishtianu Ronaldo.
Maydonni ko‘ra olish qobiliyati — Zinedin Zidan.
Uzoqdan beriladigan zarbalar — Luka Modrich.
Standart vaziyatlar — Alessandro Del Piero, Mishel Platini, Andrea Pirlo.
Yakkakurashlardagi mahorat — Lilian Tyuram.
Yetakchilik qobiliyati — Toni Kroos.
Futbol jamoatchiligi bu ro‘yxatni qiziqish bilan muhokama qildi. Ko‘pchilik Zidan “ideal futbolchi” tasvirida sakkiz karra “Oltin to‘p” sohibi Lionel Messining birorta xususiyatini kiritmaganiga hayron bo‘ldi.
Ayrim muxlislar Zidan tanlovini hurmat bilan qabul qilgan bo‘lsa, boshqalar uning Messini e’tibordan chetda qoldirganini tanqid qildi. Ammo Zidan har doim o‘z uslubiga sodiq inson sifatida tanilgan va ehtimol, u bu orqali futbolga bo‘lgan shaxsiy qarashini ifoda etgandir.
Shunday qilib, Zidan “ideal futbolchi” konsepsiyasida texnika, kuch, intellektual o‘yin va yetakchilik fazilatlari birlashgan — ammo zamonaviy futbolning bosh yulduzi Messisiz.
“Zamin”ni Telegramʻda oʻqing!
