Yaqinda UFC rahbari Dana Uayt boks dunyosidagi mashhur promouter Eddi Xirnni tanqid qilib, “u sportni rivojlantirish uchun hech narsa qilmayapti”, degan edi. Bugun esa Xirn ushbu gaplarga javob qaytardi, deb yozdi Boxing Scene.
Eddi Xirnning aytishicha, u Uaytning fikrlarini eshitib hayron qolgan, ammo u bilan mojaro yoki tortishuvni istamaydi.
«Dananing intervyusini ko‘rib biroz xavotirlandim. Uni hurmat qilaman, u sport sohasida katta ishlar qilgan inson. Lekin men u bilan yomon munosabatda bo‘lishni xohlamayman. Shunchaki, u aytgan gaplar ortiqcha bo‘ldi, deb o‘ylayman», — dedi Xirn.
Britaniyalik promouter o‘z pozitsiyasini shunday izohladi:
«Men ehtimol, Danadek ambitsiyali emasman, lekin u ham, men ham o‘z yo‘limizdan ketayapmiz. Bizga urush yoki asabiylashish kerak emas. Har kim o‘z ishini qilaversin. Men hozirgi holatimdan mamnunman».
Xirnning bu bayonoti boks va MMA dunyosida katta muhokamaga sabab bo‘ldi. Ko‘pchilik sport tahlilchilari bu ikki tashkilot rahbarlari o‘rtasidagi munosabatlar yanada sovushi mumkinligini ta’kidlamoqda.
Eslatib o‘tamiz, Eddi Xirn “Matchroom Boxing” kompaniyasi asoschisi bo‘lib, u ko‘plab yirik janglarni tashkil etgan, jumladan Entoni Joshua, Saul Alvares va Konor Benn kabi yulduzlarning faoliyatini yo‘lga qo‘ygan.
Dana Uayt esa UFC’ni jahon darajasiga olib chiqqan va aralash janrdagi muhitni sport industriyasidagi yetakchi brendlar qatoriga qo‘shgan shaxs sifatida tanilgan.
Shunday qilib, ikki sport olami yetakchisining fikrlar to‘qnashuvi hamon davom etmoqda — biri tinchlik sari chaqirsa, ikkinchisi raqobat muhitini kuchaytirish tarafdori bo‘lib qolmoqda.
“Zamin”ni Telegramʻda oʻqing!
