Rossiyalik UFC jangchisi Islom Maxachevning menejeri Rizvan Magomedov sportchining yaqinda qabul qilgan muhim qarorini ochiqladi. Unga ko‘ra, Maxachev yengil vazn (70 kg) toifasidagi chempionlik kamaridan voz kechib, yangi sinov — yarim o‘rta vazn (77 kg) divizioniga o‘tishni ma’qul ko‘rgan.
Menejerning ta’kidlashicha, bu qaror jangchi uchun og‘ir bo‘lmagan. “Bu qaror unga umuman qiyin bo‘lmadi, chunki u bu haqda ancha vaqtdan beri o‘ylab yurardi. Bir kuni Islom menga ‘motivatsiyani yo‘qotayapman, kamarni himoya qilish endi oddiy ishga aylanmoqda’, dedi. U hatto tayyorgarlikka jiddiy yondosha olmaslikdan qo‘rqardi. Shu sababli yangi toifaga o‘tish orqali o‘sha ichki olovni qayta topdi,” — dedi Magomedov.
Menejerning so‘zlariga ko‘ra, Maxachev yangi vaznda ham yuksak natijalar ko‘rsatishga intilayapti. “Hozir u butunlay boshqacha kayfiyatda. Bu yangi bosqich uning ichidagi raqobat ruhini qayta yoqdi. Albatta, u bu qarorni oldindan rejalashtirgandi, ammo Belal Muhammad chempion bo‘lgani sababli biroz ikkilanayotgan edi. Endi esa hamma narsa o‘z o‘rniga tushdi,” — deya qo‘shimcha qildi u.
Eslatib o‘tamiz, 16-noyabr kuni bo‘lib o‘tadigan “UFC 322” turnirida Islom Maxachev yangi toifadagi ilk jangini o‘tkazadi. Uning raqibi — yarim o‘rta vazn chempioni, avstraliyalik Jek Della Maddalena bo‘ladi.
Bu to‘qnashuv nafaqat Maxachev uchun yangi vazndagi debyut, balki tarixiy ahamiyatga ega bo‘lishi mumkin — u agar g‘alaba qozonsa, ikki vazn toifasida ham chempionlikni qo‘lga kiritgan UFC yulduzlari safiga qo‘shiladi.
Shu bilan Maxachev o‘zining yangi maqsadi — yangi divizionda ham zo‘rlikni isbotlash uchun yo‘lga chiqdi.
“Zamin”ni Telegramʻda oʻqing!
